Nganong bitaw nga ni-enter?

Mitoo ko sa pamahayag sa babayeng naluwas sa pagpang-“salvage” nga mga polis ang nagpatay niadtong lima ka tawo didto sa Barangay Malubog, Dakbayan sa Sugbo nga gidudahang nalambigit sa gidiling matang sa drugas.

Apan ang problema kon unsaon sa pagmatuod niini?

Giangkon ni Chairmaine Puran nga siya ug ang usa niadtong lima nga napatay, mopayuhot unta og shabu, apan sila gidakop.

Para kanako, tibuk-on na nako ang akong hunahuna nga kadtong mga mipatay sa lima ka giingong nalambigit sa drugas, mga polis. Apan ang pangutana mao kini.

Nganong misulod man sila niining maong matang sa panginabuhi nga nasayod na man sila nga supak kini sa balaod ug gihingusgan kini sa presidente?

Ang tinuod, supak sa balaod ang pagpatay sa usa ka tawo, bisan pa man og nakahimo kini og salaod, gawas lang kon misukol.

Apan angkunon nako nga matag higayon nga may mga mapatay nga nalambigit sa ilegal nga drugas, bation ko og kalipay.

Kining mga tawhana wala nay gikahadlokan, ug gani armado kining mga tawhana bisan og wala sila’y mga pagtugot nga makatinil og armas.

Kon imong dakpon ug pasakaan og kaso, labing siguro makamaniobra aron mapalugak ang kaso ug sila makapiyansa.

Dayon, sa husay sa kaso, posible pa nga makapanuborno og ma-dismiss ra ang kaso. Isog kaayo kining mga tawhana kay dili ikalimod nga daghan na usab sila og mga napatay.

Angay lang nga ang kapolisan mohimo na gayud og estrikto nga lakang.

Apan mentras karon pa, hangyoon nako kadtong mga nagpadayon pa sa pagpamaligya og mga ilegal nga drugas, nga hunong na tawon mo uy mentras wala pa kamo mapatay sa mga polis.

Luoy kaayo ang inyong mga pamilya nga mag-antos kon wala na kamo.

Unya, kadtong mga tawo nga anaa na sa target list sa mga sakop sa “hunter’s team” pagbantay kay sigurado ko nga nagpabugnaw lang una ug nangita lang og higayon ang mga mopatay ninyo. Ngano bitaw nga ni-enter mo.

* * *

Dili gyud diay tinuod nga si Konsehal Dave Tumulak maoy kandidato sa pagka bise mayor sa grupong Barug PDP dinhi sa dakbayan.

Gihulagway kini ni Vice Mayor Edgardo Labella nga usa ka pagpanglingla ug gitumong aron gubton ang ilang grupo.

Sa laktod, intriga. Mahimong giintriga si Konsehal Dave Tumulak ug si kanhi mayor Michael Rama.

Kini aron nga masuko si Mayor Tomas Osmeña kang Tumulak, ug si Rama mahiubos kang Labella ug mobuwag sa grupo. Hahaha.