Natarantar na

Nganong mura man og natarantar karon si Mayor Tomas Osmeña human gipasakaan og kasong murder iyang suod nga higala ug alyado sa politika nga si kanhi Kapitan Jessielou “Jijing” Cadungog sa Barangay Tejero kinsa gihinganlan sa kapolisan nga anaa sa drug watchlist?

Sa iyang Facebook account, gi-post sa mayor ang kunohay text message gikan sa kunohay usa ka sakop sa Police Regional Office (PRO-7) nga nagpahibalo nga adunay nagplanong mopatay kaniya ug nagplanong i-link siya sa ilegal nga drugas.

Dili gyud ko motuong adunay polis sa PRO-7 nga mo-text ni Tomas.

Nasayod ang mga polis diha nga gibantayan na ang mayor sa iyang mga lihok tungod sa paglaban niya kang Cadungog pinaagi sa pag-ingon nga iya kining protektaran ug siya mismo mangunay pag-bodyguard niini.

Dili ba kaha ang mayor ra ang nag-text-text sa iyang kaugalingon aron lang adunay ikapakita sa publiko nga adunay hulga sa iyang kinabuhi?

Kon walay binuang nga gitagoan ang mayor, dili siya angayang mabalaka.

Usa sa nakasilaob ning tanan mao ang pakigbangi ni Tomas sa kapolisan. Samtang si PRO-7 Director Debold Sinas miingon nga “safe” ang Cebu, ang mayor milalis nga dili na safe ang lugar tungod sa sigeng patay.

Ang mga negosyante usab nga nadala sa impluwensiya sa mayor dali nga nakasakay (front seat) pa pinaagi sa pag-ingon nga kuyaw og manglayas na sa Cebu ang mga negosyante tungod sigeng patay. Gipangtumba pulos adunay kalambigitan sa ilegal nga drugas.

Apil na gani diha ang duha ka agent sa Philippine Drug Enforcement Agency (PDEA), 11 ka mga polis, ug mga opisyal sa barangay.

Unya nganong ikaguol man kon mangamatay ang mga salot sa katilingban?

Tinuod nga adunay balaod aron pagsilot kanila. Apan kining mga kanahang dagko duwaan lang ang atong hustisya pinaagi sa ilang kuwarta. Paliton ang piskal ug huwes, impas ang kaso ug pabilin silang gawasnon.

Dili ko mo-tolerate og patay, apan kining mga nalambigit sa drugas dili usab mahadlok mopatay, bisan sa mga inosenteng gusto nilang biktimahon. Busa, dili kita safe hangtod mawala kining mga salot sa katilingban.

Sa mga tuig 2004 ngadto sa 2006, 168 ka mga tawo nga adunay criminal records gipangtumba dinhi sa Cebu City.

Si Tomas mipakpak niining vigilante-style killing pagpakita nga suportado niya kini, nga na-inspire sa gibuhat didto sa Davao.

Niadtong 2009, ang listahan sa Human Rights Watch miapil sa Cebu City nga ubos sa liderato ni Tomas diin adunay 202 ka kasong vigilante-style killing sa siyudad.

Kaniadtong 2004 hangtod 2009, gipanghambog ni Tomas ang patay, apan karon nakig-away na siya sa kapolisan sa sigeng patay kay dili na safe ang Cebu City?

Nakiglalis na siya kay apil diay sa target iyang mga suod ug alyado?