Wa na makabayad sa abangan

Dear Atty. Divine:

Duna mi gipaabangan nga yuta. Apan sukad niadtong Enero hangtud karong buwana, wa na gyud mohatag sa abang ang nag-rent niini.

Wa mi kontrata nga gipirmahan ug nakadesisyon mi karon nga gamiton na ang maong luna aron among tukuran og balay.

Ang akong pangutana kon pwede ba namo papahawaon ang nag-abang?

Unsay  among buhaton aron amo kining mapapahawa? Daghang salamat.

Mario

* * *

Dear Mario,

Kon napakyas sila sa pagbayad sa abangan sud na sa kapin sa pito ka buwan, duna gyud moy katungod nga mopapahawa sa nag-abang pinaagi sa pagpadala og demand letter, apan kon ilang ibalewala ang inyong demand letter, mamahimo sab ninyo kining  pasakaan og reklamo sa barangay diin mahimutang ang property ug inyong i-demand nga ilang i- vacate ang property dili lang tungod kay napakyas sila sa pagbayad sa abang but tungod usab kay inyo nang gamiton ang property.

Kon di mo ma-settle sa barangay then mopasaka  na gyud mo og Ejectment case batok sa nagpuyo ngadto sa korte sa Municipal Trial Court. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] og akong tubagon ang inyong pangutana pinaagi sa akong column matag Miyerkules, Sabado og Domingo.