Dili matakpan ang tinuod

Buntag sa miaging Lunes, Hulyo 30, mibaha ang dugoong balita bahin sa gibanhigan nga kanhi Tejero barangay kapitan ug karon Kagawad Jessilou Cadungog, diin matud pa, imbes maoy matodas ang gibanhigan, ang namanhig na hinuon nga riding-in-tandem ang nahagba-patay ug nasikop ang kauban niini.

Usa sa mga lumolupyo sa Tejero, kinsa usa sa midugok gilayon human sa mga buto nga nadungog didto sa nahitaboan miingon nga may duha kunong sakay sa motorsiklo nga nagsunod sa service car ni Kagawad Cadungog.

Sumala pa nga dili na diay si Cadungog ang nagmaneho kay ang iyaha na lang drayber, kinsa nipusil sa gituohan niining mo-ambus kanila.

Ang drayber sa motor misulay pag-ikyas apan nasikop ra gihapon.

Naguba ang nawong sa katawhan dihang nasayran nga ang gipasanginlang hitman usa diay ka polis ug ang drayber usa sab ka police asset.

Bulilyasong hitabo, kay nahisama sa maskara nga nawalis ug nakapatumaw hinuon og pagduda kon kinsa kining mga anino nga mipauso sa gikahadlokang riding-in-tandem?

Ang direktor sa Police Regional Office-7, Chief Superintendent Debold Sinas, hugtanong mihimakak ug dili tinuod ang alegasyon nga giambus sa duha si Cadungog.

Kon dili, ang drayber ni Cadungog maoy nangambus ug ang prime suspect, si Cadungog. Mao ba? Morag lisod ning tuohan niadtong nakasaksi ug nakadungog sa orihinal nga hitabo.

Labi na, kay ang police asset, kinsa ilaha rang kaugalingong tawo, anaa sa ilang kustodiya, diin sila ra poy moimbestigar.

Si Cadungog ug iyang drayber wala makaila nga mga polis ang misulay pagpatay sa kagawad. Unya, nganong sila man hinuon ang nangambus?

Kinahanglang mapasabot kini og maayo sa kapolisan ngadto sa katawhan kay makapasamot kini pagkaguba sa ilang imahe nga naguba nang daan.

Nindot unta, nga no matter how truth hurts, all persons involved of the said incident must tell the truth. Kay bisa’g unsaon pagtabon sa bakak, dili gyud matakpan ang tinuod sa mga mata sa Diyos.