Talinghaga sa kamatayon ni Dumpit

Lisod katuohan ang giingon sa otoridad nga pagkalambigit ni SPO1 Adonis Dumpit sa negosyo sa gidili nga druga hinungdan sa kamatayon niini atol sa operasyon sa mga sakop sa National Bureau of Investigation-7 ug Police Regional Office-7.

Sa atong nahibaw-an, ligdong ang panerbisyo ni Dumpit, ilabina sa dihang nadestino pa kini dinhi sa dakbayan sa Sugbo.

Gani, daghang mga badlongon sa katilingban ang mikakak ug mibakwit gikan ning siyudad kay hadlok lagi silang matumba ni Dumpit.

Sa ka maayo sa performance ni Dumpit nahimo kini nga paborito nga polis ni Mayor Tomas Osmeña.

Ug sa ka suod niini ngadto sa mayor nahimo kini nga bodyguard ni Osmeña ug sa iyang pamilya tungod usab sa dako nga pagsalig sa mayor kaniya.

Apan daghan ang dili makatuo sa gidangatan ni Dumpit didto sa Bohol diin didto siya nadestino human sa iyang paggawas sa bilanggoan human siya nakapiyansa sa kasong murder.

Kay kon ang otoridad maoy tuohan nalambigit gayud kuno siya sa ilegal nga drugas.

Apan tinuod ba nga misulod gayud si Dumpit sa negosyo sa ilegal nga druga samtang didto siya nadestino sa probinsiya sa Bohol?

Sa mga nakaila kaniya dako kana nga imposible, ilabina nga pabilin nga simple lamang ang iyang pamuyo ug lifestyle.

Sa operasyon sa otoridad, aduna kunoy dili momenos 15 ka pakete sa shabu ang ilang nakuha gikan sa posesyon ni Dumpit sa dihang nahagba na siya.

Ug hagbay ra kuno nila nga gi-monitor ang maong polis tungod sa mga report nga nalambigit gayud kini sa druga.

Sa ako usab nga pangagpas, lisod usab tuohan ang alegasyon sa uban nga gituyo og tanom sa otoridad kadtong druga nga ilang nakuha gikan ni Dumpit.

Dili notoryos ang NBI nga mo-planted og mga ebidensiya ngadto sa ilang mga dinakpan.

Gani usa kini ka premyado nga investigating agency sa kagamhanan.

Hinuon patay na si Dumpit ug dili na gayud siya makatubag sa mga kwestiyon nga naglikos sa iyang kamatayon.

Kon tinuod nga nalambigit ba gayud siya sa ilegal nga druga, siya ug ang otoridad lamang ang nasayod niini.