Kumusta na Venus

Buwan sa Mayo, tuig 2015, miabot si Venus sa among pamilya. Sa una, si Venus nagpaniid lang sa lihok sa mga tawo nga nagpalibot kaniya. Apan sa kadugayan, milutaw na ang iyang pagka siya. Paraygon kaayo si Venus. Makalingaw ug makapawala sa kakapoy.

Matag abot nako gikan sa trabaho, siya ang unang mosugat nako, dayon lambing ug magpahalok, unya mangita na sa akong dala. Mas mosugat pa gud si Venus nako, kay sa akong mga anak.

Pinangga sa akong pamilya si Venus tungod sa iyang pagka buotan, bisan tuod og dunay mga panahon nga maglagot pud ko niya tungod sa pagka pilian og pagkaon. Gawas nga pilian, pul-anon pud siya og pagkaon. Gani dunay mga panahon nga mas lami pa ang iyang gikaon kay sa among gikaon. Dili pud siya matulog kon dili kutson ang higdaan, mao nga usa ka higayon niana akong gikasab-an ug giyawyawan.

Pero naluoy na lang pud ko kay nagpaluoyluoy sa iyang mga mata. Panahon sa kagabhion, manuktok sa kuwarto ug sa imong pag-abli, mosulod dayon ug motupad nimo.

Kon masuko, si Venus dili gyud mopahawa sa pultahan bisan unsaon nimo sa pagpapahawa, mao nga mapugos ko sa pagkugos niya. Niining pipila ka adlaw, nagsige na og balik sa klinika si Venus tungod kay nagkasakit.

Niadtong Hunyo 16, among gidala pagbalik si Venus sa klinika ug gipa-admit gyud siya sa klinika ni Dr. Ryan Yandog III sa Barangay Guadalupe.

Kada adlaw namo siya nga giduaw, hangtud nga usa ka subo nga tawag sa telepono ang among nadawat niadtong gabii sa Hunyo 20. Si Dr. Yandog nagpahibawo namo nga namatay si Venus.

Pwerteng hilak sa akong asawa ug anak. Naghuot pud ang akong dughan ug wa ko makasabot sa akong gibati. Pagka buntag, amo dayon nga giadto sa klinika si Venus, nga among iro ug gihimo ang disente nga paglubong kaniya.