Isumbong mo

Nagkadaghan ang mga report nga akong nadawat nga misumbong kanako kabahin sa lainlaing ilegal nga kalihokan, dili lang dinhi sa dakbayan sa Sugbo, kon dili, apil na sa tibuok probinsya. May report pa gani nga gikan sa Leyte, Bohol ug Isla sa Bantayan.

Dunay report nga nagsumbong kabahin sa naghitak nga ilegal nga sugal, sama sa illegal swertres, video karera, moli-moli, tigbakay, dunay mga mi-report kabahin sa mga silingan nila nga nagnegosyo og shabu, dunay mitaho kabahin sa pag-negosyo og retail nga gasolina.

Pagka karon, gihagoan gyud nako kini sa pag-compile kay aron tingbon nako pagtunol ngadto sa mga opisyal nga gitugyanan sa kagamhanan aron himoan og operation ang maong mga ilegal nga kalihokan.

Paminaw nako, arang-arang kini nga paagi kay nagpapating na lang ang ubang polis nga dili na motagad sa isuwat nato dinhi. Klaro kaayo nga gihilam-os lang nila ang kauwaw, bugti sa madawat nila nga salapi gikan sa mga tigpasiugda sa ilegal nga kalihokan.

Kon ipaagi nato sa suwat, nga i-personal nako sa pagtunol kanila, hayan nga mapugos nato sila sa paglihok. Ang tinuod, nauwaw na kaayo ko sa akong mga inpormer nga kanunay’ng moreport nako. Sama diha sa Carreta, duna kuno’y mga polis sa Waterfront nga tigpanalipod sa mga video karera mao nga wala gyud kini masakmit.

Kagabii, daghan kaayong report nga akong nadawat. Usa sa mi-report nako, taga Barangay Suba nga klaro kaayong nasuko kay wala gyud kuno sila, makatulog sa kasaba tungod sa nagduwa og video karera sa balay sa ilang silingan.

Gisuwayan nako og reply, ug gipangutana kon daghan ba diay’ng illegal gambling machines sa ilang lugar. Giingnan ko nga misamot na hinoon kuno kadaghan sa mga video karera ug moli-moli sa ilang dapit. Abi ba nako kadto og nahurot-hurot na ang mga video karera ug moli-moli kay nakita man nako sa balita sa TV kaniadtong Huwebes nga pwerteng daghana nga illegal gambling machines nga giguba.

* * *

Palihug lang, kadtong mohatag nako og report kabahin sa mga video karera ug moli-moli, butangi sa ngalan sa tag-iya sa balay nga gibutangan sa maong illegal gambling machines, sa lugar ug, mas nindot gyud kon makahatod unta kamo og sketch.

Ayaw kahadlok nga mahibaw-ang kamo maoy nagpahibalo kanako kay dili gayud kana mahitabo. Itug-an kon may mga ilegal nga swertres operator sa inyong lugar.

Husto ang pagabuhaton ni Konsehal Dave Tumulak nga magpakisayod siya gikan sa PCSO sa mga legal nga outlets kay aron pahimoan og kampanya ang mga ilegal.

Usbon nako, akong i-compile ang madawat nako nga report, ug paabota ang resulta. Ayaw lang kaayo pagdali, pero trabahoon gyud nato ni. Text lang sa 0943-0766611.