Prisohan dili na luwas

Dili na bag-o nga dunay piniriso nga patyon sulod sa prisohan. Kon dili polis ang makapatay, ang kaubang binilanggo maoy mopatay. Pusil pa ang gamiton! Ngano man?

Nganong makasulod man sa bilanggoan ang armas nga moagi man gyud ang tanan sa mga guwardiya nga moinspeksiyon? Gani, huboan man sa gisul-ob ang mosulod, diin ultimong gidiling drugas nga gilubong sa ilawom, masakpan. Unya, nganong may makalusot man gyud?

Nangayo’g hustisya ang pamilya ni Steve Go, kinsa gipusil-patay sa kaubang piniriso sa Mandaue City Jail tungod sa sugal nga hantak, diin matud pa, ang panaglalis sa duha maoy hinungdan sa dugoong hitabo.

Dili sila makatuo nga ang .38 kalibre nga revolver nga gigamit sa kriminal, iya ni Steve, base sa gitug-an sa nakapatay.

Kon unsa kahugot ang pag-ila sa kapolisan nga si Steve usa ka illegal drug player, mao sab kini kahugot ang pamalibad sa mga kabanay ni Steve, kay matud pa, nabilanggo si Steve sa kasong robbery with homicide.

Nabantayan nga sagad sa gipamatay ning panahona, ma gawas man sa prisohan, o sa sulod, sibilyan man, o police officer, pulos may mga rekord nga sila nalambigit sa illegal drug syndicates and activities.

May kalambigitan kaha kini sa pahimangno ni Tatay Digong ngadto sa kapolisan? “Kon kamo miapil-apil niini, hunong na! Kay kon dili mo mohunong, aw, nahibalo na mo unsay sunod mahitabo!”

Ingon niini kaseryuso ang atong presidente sa iyang War on Drugs dinhi sa ato. Gani, ginganlan na man niya ang pipila. Kaniadto, ang mga bag-ong laya nga drug pushers, paggawas pa lang sa bilanggoan, gipamusil-patay sa mga nag-bonnet nga mamumuno.

Mao nga nahadlok sila nga buhian kay basi’g sila maoy isunod. Mas gusto nila nga magpabilin sulod sa prisohan kay safety pa ang ilang kinabuhi. Makakaon na, unya may guwardiya pa sila!

Apan karon, ning mga kasong pagpamatay og drug-involved inmates sulod sa prisohan, diin hasta polis nga moapil sa dula, birahan pud, kining esenaha nagdala og bug-at nga mensahe:

Dili na safe puy-an ang prisohan. Busa, mga shabu users, pushers ug producers, it’s about time to start a new life. Balik ta sa Ginoo, Bay!