Kagawasan gikan sa hugaw nga katilingban

Gisaulog kagahapong adlawa ang ika-120 nga sumad sa Philippine Independence Day diin gihandom ang pakigbisog sa atong mga bayani nga maoy hinungdan nga naangkon nato ang kagawasan gikan sa kamot sa mga langyaw.

Apan ang sagad pangutana kon may kagawasan na ba gyud kita? Tinuod nga nakalingkawas na kita sa pagkaulipon gikan sa mga Katsila, ug uban pa nga mga foreign invaders.

Utang nato ang tanan sa mga bayani sama nila ni Dr. Jose Rizal, Andres Bonifacio ug kadtong mga tawo nga napatik sa libro sa kasaysayan.

Apan dili lang baya sila ang mga bayani tungod kay halos tanan sa atong katigulangan nakigbisog gyud batok sa mga langyaw’ng mananakop.

Nahitabo lang nga wala maapil ang ilang pangalan sa history book ug ang ila ra nga mga lider sa rebolusyon ang sikat kay kanunay man nga mahisgotan.

Bitaw, may kaugalingon na kita nga gobiyerno, sistema sa politika, apan dili ikalimod nga ulipon gihapon kita sa dakong utang sa mga langyaw’ng kanasuran.

Ulipon gihapon kita sa diktar sa world bank ug international monetary fund. Kanus-a man kita makalingkawas niini?

Magpabilin kining pangutana nga dili matubag hangtud nga mahaw-as kita sa bulok nga sistema sa pangagamhanan tungod usab sa naghitak nga kurapsiyon.

Sa administrasyon karon, gipaningkamotan nga malimpyohan ang mga sagbot ug dangan sa gobiyerno ug sa katilingban, apan hangtud karon, lisud gihapon kaayo nga sumpoon.

Ang kagawasan dili lang gikan sa mga langyaw, apan kagawasan mismo gikan sa hugaw nga sistema sa atong katilingban.