Kinaiya nga angayang usbon

Hapsay ra ang pagbukas sa klase niadtong Lunes, apan sama sa naandan duna gihapo’y mga problema.

Usa niini ang kakulang sa mga classroom, duna gihapo’y nagklase sa mga makeshift classroom, naa’y double shifting sa schedule.

Kini tungod kay ang mga gitukod nga bag-ong mga classroom sa mga publikong tunghaan, wala pa man mahuman.

Hinoon, dinhi sa Metro Cebu area mora’g dili kaayo dako ang problema kon classroom ug magtutudlo lang ang hisgotan.

Gani anaa’y public elementary school sa Dakbayan sa Lapu-Lapu nga ‘one is to three ratio’ o usa ka magtutudlo nga adunay 33 ka estudyante.

Ideal kini nga gidaghanon aron dili kaayo saba ang klase ug magdungganay gyud ang maestra ug ang iyang mga tinun-an.

Anaa usa’y eskwelahan nga mas gamay pa ang ‘ratio’ sa mga tinun-an, busa mihangyo kini sa mga kasikbit nga eskwelahan nga dili lang dawaton ang mga bata nga sakop sa ilang barangay nga mopa-enroll sa laing eskwelahan aron didto gyud moeskwela sa tunghaan.

Ang mahitabo diay, kon ubos ra ang enrollment rate sa usa ka eskwelahan, menosan o kuhaan kini og magtutudlo. Sa pikas bahin, usa sa nakit-ang problema mao ang kinaiya sa mga tinun-an ug mga ginikanan.

Sa unang adlaw sa klase, wala motunga ang uban nga mga tinun-an kay gipakapinan ang bakasyon. Aduna usay mao pa lang ang pagpa-enroll bisan nagsugod na ang klase.

Kini unta ang angayan usab nga usbon nga kinaiya nga diha na molihok kon ulahi na. Nag-Oplan Balik Eskwela na aron sayo ma-enrol ang mga estudyante. Nag-Brigada Eskwela na aron sugod dayon ang klase sa unang adlaw pa lang, apan magpasulabi gihapon ang kagahi sa ulo nga gusto gyud maglanganlangan.