Sininghagay sa korte

Tugoti nga akong unahon ang pagpasalamat kang SPO1 Eric Jacalan, desk officer sa Police Station 9, o Guadalupe Police Station. Niadtong miaging semana gidasmagan sa danghag nga drayber sa usa ka hardware sa Kalunasan ang poste sa kuryente diin nahimutang ang akong metro sa VECO hinungdan sa pagkabuak niini.

Tungod kay gikinahanglan ang police report, aron mailisan sa VECO og bag-o ang nabuak nga metro, ako ni nga gi-report sa police station. Si Jacalan maoy duty niadtong higayona. Giobserbahan nako ang maong polis ug akong namatikdan ang iyang kamaabi-abihon, usa ka importante nga kinaiya sa maayong desk officer.

Akong giasoy niya ang hitabo, ug ang akong gisaludohan sa maong polis tungod kay personal pa siya nga mitawag aron i-follow-up ang kuwang nga mga detalye sama sa numero sa metro. Tungod kay holiday niadtong Lunes ug gikinahanglan kaayo ang police report aron mailisan sa daling panahon ang buak nga metro paglikay sa posibleng mas dako pa nga kadaot, iyang gipaspasan ang pagproseso.

Kon pareho pa ni SPO1 Jacalan ang kinaiya sa tanang desk officer sa kapolisan, tingali wa’y magbagulbol. Ehemplo siya sa usa ka maayo ug matinud-anon nga sakop sa kapolisan ug angayan nga pasidunggan.

* * *

Miulbo ang sininghagay tali nila ni Chief Justice Maria Lourdes Sereno ug ni Associate Justice Teresita Leonardo- De Castro niadtong Martes atol sa oral argument sa quo warranto petition nga nagtinguha pagtangtang kang Sereno sa katungdanan.

Nasentro sa lantugi ang Statement of Assets, Liabilities and Networth ni Sereno. Base sa ilang lantugi, maila nga dunay punto si De Castro ug nga posibleng duna gyu’y sipyat si Sereno.

Apan bisan tugotan ta nga may sayop ang chief justice kabahin sa SALN, ang labing importante nga pangutana, kinsa ba ang dunay gahum pagtangtang niya?

Ang chief justice usa sa mga opisyal sa gobiyerno nga matangtang lang sa pwesto pinaagi sa impeachment.

Busa ang Senado, pinaagi sa impeachment trial, maoy angayang motuki niining maong isyu ug dili ang Korte Suprema. Dili sab maayo nga ang Korte Suprema tungod kay naklaro na base sa nahitabo niadtong Martes nga mas mipatigbabaw ang personal nga pagbati sa ubang mahistrado nga gilaktawan ni Sereno.