EDITORYAL - Luwas pa ba ang sugbo?

Mora’g gihalangan ang director sa Police Regional Office-7 sa nanggawas nga balita nga naghulagway nga adunay ‘series of killings’ dinhi sa Sugbo, kay kuno dili kini maoy husto nga paghulagway sa mga nahitabo. Si PRO-7 Director Robert Quenery miinsister nga wa’y pattern kining mga sagunson nga pagpamatay kay matud niya ang matag kaso sa pagpatay, adunay tagsa-tagsa ka mga sirkumstansya. Tingali ang iyang gipasabot mao ang mga motibo sa mga mamumuno.

Ang paghulagway sa media nga adunay sagunson nga mga kaso sa pagpatay dili man tumo-tumo kay tinuod man gyud nga adunay mga nitikangkang diha sa kadalanan nga biktima sa mga pagpamusil nga binuhatan sa mga tawo nga nagsakay og motorsiklo, ug ning bag-o, nagsakay na gyud gani og sakyanan.

Unsa man diay, aron matawag nga “series of killings” kinahanglan diay gyud nga duna’y pattern? Dili ba matawag nga pattern nga sagad sa mga biktima sa pagpamisul, o gituohang mga target, may kalambigitan, o may record sa ilegal nga drugas? Husto si Quenery nga dunay tagsa-tagsa ka sirkumstansiya ang matag kaso, apan tukma ba nga dili kita angay’ng maalarma?

Dili angay masuko ang kapolisan sa reaksyon sa katawhan nga medyo gipanguyawan na. Dili maayong pasanginlan ang media nga maoy nagpadako sa isyu kay tinuod kini nga mga panghitabo nga igo lang gi-report sa media. Kon pattern ang gipangita ni Quenery, bisan si Mayor Tomas Osmeña miingon na nga may pattern ang mga pagpamatay karon ug daw wala na’y kahadlok karon ang mga kriminal nga mohimo og krimen.

Angay’ng tutokan sa kapolisan nga ang mga kriminal wa na’y kahadlok sa balaod ug kini ang gikabalak-an pag-ayo sa katawhan ug mga lokal nga opisyal sa Sugbo, kay gawas nga makaguba kini sa imahe sa lugar, posible pa nga mapagan ang mga inosente. Masabtan kaayo nga nabalaka lang si Quenery nga mapasanginlan nga walay gihimo ang kapolisan pagsumpo sa krimen.