Sagunson nga sunog!

Nahisama sa kanta ni Imelda Papin nga “Isang Linggong Pag-ibig” ang nahitabong sunog sa siyudad sa Lapu-Lapu ug lungsod sa Cordova.

Lunes, Mayo 1 naugdaw sa sunog ang 45 ka panimalay sa Sitio Kaymitohan, Barangay Basak sa Lapu-Lapu City. Pusporo nga gidulaan sa mga bata maoy hinungdan sa sunog.

Martes, Mayo 2 sa buntag, nasunog ang usa ka balay sa Barangay Pajo, Lapu-Lapu City ug ang mihungaw nga Liquefied Petroleum Gas (LPG) ang hinungdan.

Gisundan kini sa mas grabe nga trahedya pipila ka oras lang ang nakalabay didto sa Purok Kapayas sa Barangay Canjulao. Gawas sa 14 ka balay nga naugdaw, napaig usab ang 84 anyos nga apohan kauban ang iyang 14 anyos nga apo nga usa ka PWD. Butane cannister nga mibuto ug kuryente ang duha ka posibleng hinungdan sa maong sunog.

Miyerkules, Mayo 3, mitabok ang sunog sa silingang lungsod sa Cordova diin naugdaw ang 33 ka panimalay sa Barangay Catarman. Illegal tapping sa kuryente ang gitumbok nga hinungdan nga gipasamotan sa nangbuto nga butane cannister.

Huwebes, Mayo 4, naugdaw usab ang unom ka balay sa Sitio Bliss, Barangay Ibabao, Cordova. Ang Butane stove nga napasagdan ang hinungdan sa sunog. Kun sumadahon, lima ka sunog ang nahitabo sulod lang sa upat ka adlaw.

Dili na ikapangutana nganong nahitabo kini sanglit nasayod na daan ang tanan nga mao kini ang sangpotanan sa higayon nga ibaliwala sa katawhan ang peligro nga mamugna gumikan ra usab sa ilegal nga binuhatan.

Ang paggamit sa butane cannister nga gisudlan og LPG higpit nga gidili ug labaw na ang illegal tapping sa kuryente. Nganong tuyoan man gyud?