Terorista sa social media

Gipistahan sa social media ang hulagway sa mga namatay nga sakop sa Abu Sayyaf didto sa Bohol. Naglumbaanay ang mga tawo, media ug dili media, sa pag-post sa hulagway sa mga bandido.

Gani inig tan-aw nato sa newsfeed sa Facebook, makugang na lang ta kay ang mosugat kanato mao ang naglurat nga mata ug ang mga samad sa mga namatay’ng sakop sa ASG.

Pastilan, pagka ngil-ad ug luod tan-awon. Wala na man lang gyud nauso sa uban ang pag-blur sa sensitibong imahen sa Facebook, basta kay makauna lang sa pag-post, ok na.

Bisan og dili mo badlungon sa Facebook sa mga horrible picture, kamo na lang pud unta ang maantigo nga maghunahuna nga mo-pop up intawon na ang inyong mga gi-post sa publiko nga pistahan dayon sa mga netizens.

Ang uban moingon nga mga bandido bitaw ning mga tawhana, ato ni nga ibandera ang ilang mga nawong kay mga salot ni sa katilingban.

Tinuod nga mga kriminal sila apan unsa man ang kalainan nila sa mga tawo nga nagsabwag sab og mga luod ug bulgar kaayo nga imahe sa social media?

Tungod sa atong kapungot niining mga tawhana, dili na nato mahuna-hunaan nga kita usab nahisama na sa mga terorista sa social media.

Hinay-hinay lang ta, ug hunahunaon nato nga aduna kita’y responsibilidad sa pagpatuman og decency sa kaugalingon nato nga newsfeed sa social media.

Wala man ta badlunga sa Facebook, apan kita mismo makahimo og self regulation sa atong mga post sa social media. Motubag ra ba dayon ang mga taas og garbo nga social media user nga “kun dili mo gusto sa akong mga status, i-unfriend o i-block ko ninyo”.

Hala kun ingon niini kamabaw ang imong utok, unaya pag-block ang imong kaugalingon. Posible ba?