Nasayop ang entry sa citizenship sa birth certificate

Dear Atty. Divine,

Duna ko’y pangutana labot sa entry sa akong Birth Certificate. Ang nabutang man gud nga nationality sa akong Birth Certificate kay Chinese, instead nga Filipino, kay both of my parents are Filipino.

Dili ko makakuha og Passport tungod sa sayop nga entry sa Birth Certificate sa akong citizenship. Unsa man ang akong buhaton aron makurihean kining maong sayop nga entry? Asa ko moduol? Dali ra ba ang proseso? Daghang salamat. — Cleofe

Dear Cleofe,

Duna’y duha ka paagi pag-usab sa sayop nga entry sa Birth Certificate, ang usa ipaagi sa administrative process nga diin ang Local Civil Registrar ra ang mousab kun clerical ug typographical error lang ang imong usbon sa Birth Certificate, samtang ang ikaduha nga proseso ipaagi gyud sa korte pinaagi sa pagpasaka og Petition.

Kun ang imong usbon mao gyud ang imong citizenship ug uban pa nga substantial errors, then moagi na gyud kini sa Korte. Kinahanglan ka nga mo-file og Petition sa Korte sa lugar diin ka marehistro alang sa pag-usab sa entry sa imong citizenship sa Birth Certificate.

Ang maayo nimo nga buhaton karon mao ang pag-adto sa abogado nimo aron iyang maandam ang imong Petition ug ang imong mga ebidensya nga angay nimong ipresentar sa korte.

Ang gidugayon sa proseso magdepende sa calendar sa korte nga adto ma-assign ang imong kaso apan dili sab kini madugay pag-ayo kay special proceedings man kini, busa mas dali ang proseso kun itandi sa ubang kaso. Thanks and God bless. -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.