Cloud burst

Napulo ka kinabuhi ang nakalas sa Lalawigan sa Sugbo tungod sa bagyo nga Crising.

Walo sa Carmen, usa sa Dakbayan sa Danao nga nalumos sa baha, ug laing usa ka mananagat nga namatay didto sa lungsod sa Alcoy.

Dili momenus sa 10,000 mil ka tawo ang naapektohan gikan sa 11 ka lungsod ug component cities sa probinsiya.

Ngano nga ingon man niini ka grabe ang danyos sa nahitabo nga unta gi- downgrade na man sa PAGASA ang bagyo ngadto sa Low Pressure Area (LPA).

Gisalikway sa PAGASA ang pagtuo sa mga tawo nga dunay niigo nga buhawi, ilabi na didto sa Carmen ug Danao.

Giklaro niini nga cloud burst o ang pagbuto sa baga kaayo nga dag-om nga daw gikausa sa paghuwad ang natigom nga ulan maoy hinungdan sa flash floods.

Nakasukod ang PAGASA og 62.8 rain volume, o 300 mil kapin nga baril sa tubig ang gibubo sulod lang sa tulo ka oras.

Ang cloud burst namugna human nga wala madala sa bagyo ang tanang ulan ug napundo kini ug gipagrabe pa sa LPA.

Pasabot sa PAGASA nga mas delikado diay ang LPA kay segurado kining makamugna og baha nga maoy nahitabo sa Easter Sunday.

Kini ang angayan ipasabot sa mga tinugyanan sa Local Government Unit (LGU) ngadto sa ilang katawhan aron dili na mokumpyansa ug malikay sila sa disgrasya.