‘Wow mali’

Naingganyo ko sa mga komentaryo may kalabotan sa kataw-anang isyu kabahin sa taho nga mitambong kuno si Cebu City Mayor Tomas Osmeña sa usa ka panihapon kauban si Presidente Rodrigo Duterte atol sa iyang pagbisita sa Sugbo niadtong groundbreaking sa ikatulo nga tulay nga nagkonektar sa mainland ug Mactan.

Lakip na ako sa daghang personalidad nga nainteres sa maong isyu. Gani pipila ka  komentarista sa radyo ug kolumnista sa pamantalaan ang mipiyesta niini. Hinuon dili lamang ang mga taga media ang nadani sa maong isyu kondili lakip na kadtong ordinaryong mga tsismoso.

Gidapit kuno ang mayor sa maong panihapon. Hinuon wala man siguroy dautan sa maong imbitasyon ug sa iyang pagtambong sa maong panihapon kauban ang labing gamhanang tawo sa nasud. Adunay usa lamang nga nakaapan.

Ang nakaapan mao nga, matud sa maong taho, ang maong dinner gasto  kuno diay ni Presidential Assistant for the Visayas Michael Dino alang ni Presidente Duterte ug sa ubang mga bisita sa maong groundbreaking sa proyekto.

Tungod lagi sa grabe nga away tali ni Dino ug Osmeña, salikwaot nga hunahunaon ang presensiya ni Osmeña sa maong panihapon. Ulaw tuod nga palandungon alang ni Osmeña ang maong hitabo. Hinuon, in fairness ni Osmeña, wala gayud siya mahibalo nga gasto ba kadto ni Dino.

Apan siyaro man usab nga walay usa sa mga alipures ni Osmeña ang nakatambag sa mayor sa dili pag-adto sa maong panihapon kay diskarte kadto ni Dino. Siyaro man usab kun walay advance information ang kampo ni Osmeña sa maong kalihokan, kun kinsa ba ang nagpasiugda niini.

Kun tinuod man ugaling nga kang Dino kadtong gasto sa panihapon, klaro nga na “wow mali” ang mayor kun sa Tinagalog pa. Apan bisan pa sa kadako sa ilang panagbingkil, insakto usab ang gibuhat sa kampo ni Dino sa wala lamang pagpanumbaling sa presensiya ni Osmeña sa maong kalihokan.