Kinahanglan magtinarong

Mura’g dili maayo ang pag-arangkada sa bag-ong tuig alang sa pipila ka lokal nga opisyal sa kalungsoran ug siyudad sa lalawigan sa Sugbo. Daghan kanila ang na-dismissed ug nasuspenso sa ilang katungdanan gumikan sa graft and corruption.

Nag-una sa listahan sa mga na-dismissed sa katungdanan  sa Ombudsman mao ang mga mayor sa mga lungsod sa Aloguinsan ug Dumanjug kinsa gipangpulihan na sa ilang mga bise mayor.

Doble ang maldisyon nga naangkon sa mayor sa Aloguinsan nga si Augustus Caesar Moreno tungod sa pagkakonbikto usab sa iyang asawa sa kasong graft. Gani dakponon na karon si kanhi mayor Cynthia Moreno human kini malutsi og warrant of arrest. Sa dakbayan sa Lapu-Lapu, kamulo na usab nga nasuspenso si Mayor Paz Radaza. Ang iyang kaso may kalambigitan sa hagbay rang reklamo apan karon lamang madesisyoni nga anaa na siya sa posisyon, hinungdan sa iyang pagkasuspenso.

Sa Provincial Board, ikaduha nga suspenso ang mihapak kang ex-officio member Tining Martinez tungod sa alegasyon sa graft. Duha ka bulan pa gani siyang nahibalik sa puwesto human sa una niya nga pagkasuspenso, apan gihapsan na usab si Martinez og laing suspenso.

Daghan pang mga lokal nga opisyales sa probinsiya ang gisuspenso sa opisina sa Ombudsman sugod sa bag-ong tuig tungod lagi sa graft and corruption ug uban pang mga reklamo. Ug makapaabot kita nga aduna pay umaabot nga masikwate tungod sa kadaghan sa mga reklamo nga nadawat sa maong buhatan.

Hinuon, mahimong leksiyon kining pagkasuspenso sa pipila ka lokal nga opisyales ngadto sa uban pang mga lideres sa lalawigan. Nga kinahanglan gayud nga magtinarong sila sa ilang pagpangatungdanan. Kini aron dili sila masikwate inig susi na unya sa Ombudsman.

Dili ba nga piniketo kaayo ang pagpanerbisyo sa gobiyerno? Dili ba nga kinahanglan gayud nga walay trampas ang tanang  opisyal nga transaksiyon nga bisan piso dili gayud matago? Mao nang importante gayud sa atong mga opisyal ang magtinarong sa ilang pagpangatungdanan.