Gugmang salingkapaw

Matag bagting sa lingganay adunay madungog nga awit

Lahi nga awit nga kanunay’ng magasungog

Sa bangis kong kasingkasing.

Pasayloa ako, Pinangga, sa  pagpahilak kanimo

Niadtong mga adlaw nga ako wala maminaw

Sa imong inagulo, sa imong mga bakho.

Buot ko nimong hawiran ug nakita ko

Ang imong mga luha nga kusog kaayong midaligdig

Agi sa kanalkanal sa imong kaapingan.

Miluhod ka gani niadto

Apan bungol ako. Yabag ako nga wala bugtii ang lunsay

Ug timgas mong paghigugma. Salbahis ako kay sayon ko

Ra ikaw’ng gipahilak sama sa bulak

Nga inanay’ng gibiyaan sa mga yamog.

Oo, hungog! Boang! Way balatian kining

Akong kasingkasing! -- apan miabot ang utlanan

Sa akong kasaypanan kay ako karon mao nay nagbangotan

Nangita kanimo, naghandom sa imong pahiyom

Kay gusto kong balikon kadtong mga gutlong

Gibuhi sa atong mga katawa. Apan gahi na ang imong

Kasingkasing, tig-a na sama sa batong bantilis

Gigabaan ako sa gugma kong salingkapaw

Nga mao ra say mitulisok sa akong tanaman

Nga mao ra say akong lubnganan.

#HUGOT

Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan?  Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo ka na nga ipabuhagay pinaagi sa pagbalak!

Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma. - Mel Gabriel - Carcar City, Cebu 

Ipadayag ang imong HUGOT sa gugma! Ipadala   pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:

HUGOT BALAK

C/o Banat News  V. Gullas St., cor. D. Jakosalem St.

Barangay Santo Niño 6000,  Cebu City,  Philippines