Kapaspas sa Japan

Kanindot kun manakod dinhi sa Pilipinas ang kapaspas sa Japan sa paghatag og kasulbaran sa mga batakan nga serbisyo ngadto sa ilang mga molupyo.

Niadtong Nobiyembre 8, nihulpa ang usa ka bahin sa dalan sa Fukuoka City, Japan. Gituohan nga naapektahan kini sa gitukod nga subway sa duol.

May 30 metros, kon dul-an usa ka gatos ka tiil nga giladpon ug 15 metros nga giladmon ang paghulpa sa 5-lane nga karsada sa usa ka busy nga business district sa habagatang kasadpan nga bahin sa Fukuoka City.

Siguro namonitor na sa mga hingtungdang ahensya ug sa mga enhinyero sa Fukuoka City ang hinay-hinay nga paghulpa sa yuta nga niresulta sa usa ka lawom nga sinkhole tungod kay walay bisan usa ka tawo nga nasamdan o sakyanan nga naapil sa pagsuyop sa nihulpa nga karsada.

Bisan kun nisiwil ang pipila ka columns sa tag-as nga mga building sa traffic intersection, walay building nga nihulpa ug apil nga gilamoy sa sinkhole. Ang Fukuoka City mao ang labing dakong siyudad sa habagatang bahin sa isla sa Kyushu, Japan.

Usa ka semana human sa insidente, gibuksan na pagbalik ang maong agianan ngadto sa publiko ug sa trapiko. Tibuok adlaw ug gabii nga gitrabaho ang nihulpa nga agianan. Nahibalik na ang tanang linya sa  kuryente, gas ug tubig nga naputol sa paghulpa sa dalan.

Ang mayor sa Fukuoka City, Soichiro Takishima nga nangayo og pasaylo sa kahasol sa nahitabo, nibutyag nga ila na nga gitugtan ang pagpasulod sa mga building nga naapektahan sa paghulpa sa yuta.

Niani og daghang pagdayeg ang kapaspas sa taga Fukuoka City, Japan sa pag-ayo sa nihulpa nga dalan. Saksi usab ang tibuok kalibutan sa kaandam ug kapaspas sa Japan sa pagluwas, pag-atiman ug pagbangon human sa 9.1 magnitude nga linog ug tsunami niadtong Marso 11, 2011.

Unsa kaha kun sagupon o sundon sa Pilipinas ang paspas nga sistema sa Japan sa pag-atiman sa batakan nga serbisyo ngadto sa ilang mga molupyo?

Nisaad si Presidente Rodrigo Duterte atol sa ikatulong tuig nga kasumaran sa bagyong Yolanda niadtong Nobiyembre 8, didto sa Tacloban City, nga matukod na ang panimalay sa mga biktima sa bagyo sulod sa duha ka buwan. Nipasalig siya nga mobalik sa Tacloban City human sa usa ka buwan aron masusi ang kalamboan sa iyang gisaad.

Matuman ba kaha ang maong saad kun ang sistema mismo sa  gobiyerno hilabihan kalangay ug kadaghan sa limitasyon? Kun si kinsa pa ang mas nagkinahanglan, mao pa ang mag-antos og dugay ug mahikawan sa kahigayonan nga makapahimulos sa mga batakan nga serbisyo.