Teknolohiya vs agrikultura

Karong nagsige na sa pag-uwan, nakasukad ug nakabuylo na sa pagtubo ang mga tanom. Ang kabukiran sa Sugbo, himsog na usab tan-awon karong nakatubo na ang mga tanom. Nindot na tan-awon ang kalunhaw sa tanom. Mapahiyumon na usab ang mga mag-uugma tungod sa himsog nga tubo sa ilang mga tanom, sama sa mga utanon ug mga buwak. Gani, ang gitawag nga little Amsterdam sa Barangay Sirao, dakbayan sa Sugbo kon ang Sirao garden, nanubo ug namukhad na ang mga buwak nga Celocia, busa gidagsa na usab kini sa daghang bisita aron maka-selfie taliwa sa mga buwak.

Makahupay sa kakapoy ug makawala sa stress ang pagsud-ong sa mga buwak ug ang kalunhaw sa palibot. Maghatag usab kanato og presko ug limpyo nga hangin ang mga tanom. Gani, dunay pipila sa mga may kakulian na sa panglawas, sama sa paralysis resulta sa stroke, motuyo sa pag-adto aron makakita ug makahanggap og preskong hangin.

Lahi ra gyud ang pamation sa lawas kun kanunay ka nga ma-expose sa polusyon, kasaba ug kainit kun naa ka sa siyudad nga gipalibutan ka sa mga sementadong establisemento.

Kun naa ka sa bukid, makalimot ka sa oras, dili ka kinahanglan nga magdali ug mag-apas sa oras. Bisan kun mingaw sa bukid apan dili ka laayon. Malingaw ka ra sa kabugnaw sa palibot, sa tingog sa mga langgam ug kun ganahan ka mananom, mataligam-an ra sab nimo ang oras.

Mao na nga mahibulong ko ngano nga daghang mamiya sa bukid ug molugsong gyud sa patag ug magpasiyudad nga unta walay kasigurohan ang kinabuhi sa siyudad. Gawas nga dili sayon ang kasigurohan sa nindot nga trabaho, dili ka na makahanggap og presko nga hangin. Sama sa taxi driver nga si Richie nga taga Aloguinsan, niboluntaryo sa pag-asoy nga matag day off niya sa pag-drive mouli gyud siya sa ila aron motikad sa ilang uma.

Sulod sa duha ka adlaw ra siya nga mag-drive og taxi, wala siya magpuyo sa siyudad. Sa 24 oras nga pag-drive kun bation siya og katulogon, motagpilaw sa makadiyot sulod sa sakyanan, apan mouli gyud siya sa ila human sa duty.

Pamuno-puno ra niya ang kita sa taxi, samtang mag-uma siya sa ilang yuta ug sa ubang umahan. Matud niya may makita gyud sa bukid kun magkugi ra.

Samtang nagkamoderno ang panahon ug nagkapaspas ang teknolohiya, importante nga dili ipadaplin ang pagpalambo sa agrikultura tungod kay gikinahanglan ug importante usab kini nga aspeto sa paglambo sa ekonomiya sa nasud.

Mag-unsa man ang teknolohiya kun gutom ang kadaghanan tungod kay nagkuwang ang mga abot sa yuta ug pulos na lang processed food  ang gikaon tungod kay wala nay motikad sa mga umahan?

Dili usab angay isakripisyo tungod ug alang sa kalamboan nga gub-on ang kabukiran aron tukoran og tag-as nga building ug mga pinuy-anan inay kakahoyan, mga utanon ug lagutmon. Sa paglambo sa teknolohiya, kinahanglan nga dili usab mabiyaan ang agrikultura.