Emergency Power sa traffic?

Gipahigayon dinhi sa Sugbo niadtong Sabado ang hearing sa House committee on transportation ni chairman Cesar Sarmiento sa paghatag og emergency power ni Presidente Rodrigo Duterte alang sa dinalian nga pagsulbad sa problema sa trapiko dili para sa tibuok nasud kon dili para lang sa Metro Manila ug Metro Cebu.

Hapit tanang kongresista sa Sugbo ug mga mayor sa Metro Cebu nga nitambong sa hearing pulos niuyon nga hatagan sa emergency power ang presidente aron siya maoy mosulbad sa problema sa trapiko.

Kaluoy sa presidente wala pa gani siya makatibawas sa pagpakiggubat batok drugas, ug sa daghan pang mas dagkong problema nga angay niyang sulbaron, ania na usay laing problema nga iyang atubangon nga kun ato untang sabton dili na kinahanglang isangon pa ngadto kaniya.

Sa Sugbo pananglitan, naproblema sa grabeng traffic mao ang dakbayan sa Mandaue, Lapu-Lapu ug Dakbayan sa Sugbo, bag-o rang nientra sa esena ang dakbayan sa Talisay ug sa matag karon ug unya ang rota padulong sa habagatang Sugbo. Kini tungod sa kakuwang sa foresight ug urban planning. 

Apan maihap ra ang mga lugar nga maghuot ang dagan sa trapiko tali sa tulo ka dakbayan ug makairog pa bisan kun hinay ang mga sakyanan.

Sa hearing giila sa mga Sugbuanong kongresista, mga mayor ug ubang stakeholders kauban si Presidential Assistant for the Visayas Michael Dino unsay mga hinungdan sa problema. 

May mga sugyot na sa angay himoon sama sa LRT, BRT, number coding, Metro Cebu Transportation Plan ug pagdisiplina sa mga motoristang abusado. Apan wala usab nila hisgoti ang klarong zoning.

Karong ila nang natumbok ang mga problema ug poisibleng sulbad, gikinahanglan pa ba ang emergency power? Nganong dili naman lang sila ang mopatuman sa maong mga solusyon?  Kanus-a mahatag ang emergency power ngadto sa presidente? 

Base sa Batakang Balaod sa Pilipinas ang kongreso maoy makahatag sa emergency power ngadto sa presidente kun ang mga kondisyon sama sa: 1.]  gubat o ubang emerhensiya motumaw.  2.] Kun mahatag man ang emergency power ngadto sa presidente, limitado ra ang panahon ini. 3.] Ilatid usab sa kongreso asa kutob ang emergency power , ug 4.] mapatuman kini uban sa mga nasudnong palisiya nga ipasar sa kongreso.

Unsa ba ang mga sitwasyon nga makonsiderar nga emergency? Base sa mga eksperto sa balaod maglangkob kini sa rebelyon, economic crisis, epidemiya o paghugpa sa dangan, bagyo, baha ug ubang kalamidad nga niapektar tibuok nasud.

Apan sa problema sa trapiko dinhi sa Sugbo ug bisan sa Metro Manila, dili tibuok nasud ang apektado sa traffic. Nakaapektar man sa ekonomiya,  apan epekto ra usab kini sa pagpasagad, kakuwangan o pagkawalay kahibaw sa mga local chief executive ug sa mga konseho kaniadto ug karon sa pagpangita og sulbad sa nagkagrabe na nga problema sa trapiko.