Material concealment

Suspendido pa ang Senate inquiry mahitungod sa extrajudicial killings human ni-walk out si Senador Leila de Lima sa imbestigasyon niadtong Lunes sa gabii.

Mag-alas onse na sa gabii una natapos ang imbestigasyon. Apan wa kini matapos sa hapsay nga paagi tungod sa walk out ni De Lima. Nahitabo ang walk out tungod sa pasangil ni Senador Richard Gordon nga gitagoan ni De Lima ang kasayuran nga may kasong kidnapping si Edgar Matobato nunot sa iyang pag-angkon nga usa siya sa mga nipatay sa suspetsadong terorista nga si Sali Makdum ubos sa sugo ni kanhi Davao City ug karon Presidente Rodrigo Duterte.

Alang ni Gordon, ang hinay nga tingog sa pag-angkon ni De Lima nga diha sa iyang notes ang pag-angkon ni Matobato nga gipasakaan na siya og kasong kidnapping sa National Bureau of Investigation, pagtago sa maong kasayuran.

Apan taliwa sa pagpasabot ni De Lima ug sa pag-angkon nga nataligam-an niya ang maong kasayuran ug diha ra niya kini makompirmar sa pag-review sa iyang notes, niinsistir si Gordon nga gitagoan ni De Lima ang maong kasayuran.

Ang gibasehan ni Gordon mao ang reaction ni De Lima sa iyang hinay nga tingog nga sama sa nagpanuko sa pag-angkon.

Sa pagpahibawo ug pagbasa ni Senador Antonio Trillanes sa duha ka transcripts, una ang transcript nga si De Lima pa ang chairman sa Committee on Jutice and Human Rights ug ang ikaduha nga si Gordon na ang chairman, silang duha pulos nangutana ni Matobato mahitungod sa maong kaso.

Kun maghisgot ka og "material concealment" sa usa ka importante nga kasayuran, kinahanglang maestablisar nga gituyo ang pagtago ug ikaw nga gisultian wala mopahibawo niini ngadto sa mga tawo o institusyon nga gitahasan sa pagdungog sa kaso.

Apan ang maong kasayuran wala malilong sa tanang senador ug sa mga tawo nga nitambong sa hearing ug sa mga nakakita sa coverage sa telebisyon.

Dili lang siguro gustong moangkon si Gordon sa pamahayag ni Trillanes nga posibleng duna siya’y memory lapse tungod sa kadaghan sa ilang natuki ug siguro gikapoy na sila sa kataas sa oras sa ilang hearing.

Nagsugod ang maong pasangil dihang ilang nahibaw-an nga nibiya si Matobato sa Senado nga wala mananghid kanila. Kun si Senador Panfilo Lacson ang pasultihon, "naisahan tayo sa isang grade 1".

Apan ang pagbiya ni Matobato sa Senado dili iyang kaugalingong desisyon, kon dili, sa iyang handler nga si Trillanes nga maoy naghatag kaniya sa protective custody.

Gipasabot ni Trillanes nga tungod sa seguridad iyang gipapauli si Matobato tungod kay gabii na. Sa iyang pagtuo wala pa kinahanglana ang presensya ni Matobato sanglit wala gipaatubang si Matobato sa mga tawo nga iyang gilambigit sa DDS.

Material concealment ba usab ang wala pagpahibawo ni Trillanes ngadto sa komitiba nga iya na nga gipagawas sa Senado si Matobato?