EDITORYAL – Pasalida lang?

Way padulngang maayo kining panawagan nga pagtuki pagbalik sa Mamasapano massacre diha sa Senado kung adunay mga moapil nga mokandidato sa sunod eleksyon.

Apan kun did-an sila, kinsa may mahibilin nga halos silang tanan mga senador karon midagan man pag-usab, gani ang uban nidagan pagka-presidente, adunay nidagan pagka-bise presidente?

Kun kini buhaton dili gyud unta tugotan kining mga magpapili pagbalik  sa pagka-senador ug kadtong magpapili sa mas taas pa nga posisyon sa pagsalmot.

Wala nay siguro kun alang ba gyud sa kaayohan sa tanan ilabi na sa mga pamilya sa mga nakalas nga 44 ka sakop sa kapolisan ang ilaha unyang pagtuki pagbalik sa kaso.

Bisan unsa pay ilang pangangkon nga "in aide of legislation" o ang pagsuta gyud kun nganong nahitabo kadtong masaker di gyud kalikayan nga usa kini ka pamaagi aron magpasikat sa ilang kaugalingon.

Nakahibalo man gud ni sila nga pinaagi sa 'pagtuki' kunohay sa maong kaso, koberan man kini sa media ug pinaagi niini makapasalida sila og maayo kay makita man kini sa tibuok Pilipinas.

Kun gusto gyud silang mahatagan og hustisya ang mga nakalas, angay nga ilang isalig ang pagtuki sa kaso sa mga sakop sa Department of Justice ug sa uban pang law enforcement agencies ug dili silang mga politiko.

Di unta nila gamiton nga venue sa ilang political interest ang Mamasapano probe kay  syaro na man, wala na lang gyud silay laing nahunahunaan nga mamahimong pangampanya, wala ba silay konsensya?

Daghang kapiliang mga ahensya sa gobiyerno nga mahimong mopadayon pagtuki ug pag-imbestigar sa kaso alang sa katagbawan sa tanan, apan dili usa niini ang Senado karong naghinangat na ang eleksyon.