Kuya bungol ka?

Nag-viral sa social media ang usa ka video nga gi-upload sa usa ka netizen nga nakigkumprontasi sa usa ka unipormadong traffic enforcer sa Cebu City Transportation Office (CCTO).

Gisaysay sa nag-upload nga niadtong Enero 15, siya ug ang iyang mga barkada nakaagi og usa ka tigulang nga luya na kaayo samtang nag-inusara nga naglakaw.

Nagpakabana sila pinaagi sa pagtawag og taxi aron kapasakyan sa tigulang, apan lisud kaayo sanglit daghan mga pasahero nga nag-atang.

Miduol sila sa traffic enforcer aron mangayo og assistance apan matud pa nga wala kini manumbaling hinungdan nga giingnan siya sa babaye "kuya bungol ka?"

Dali nga nakadungog ang enforcer, dayong banghag ug kasaba ngadto sa babaye kay matud pa walay respeto kaniya.

Ang naasoy’ng video daw gipapas na sa nag-upload sanglit dili na man ma-search sa iyang Facebook account, apan una na kadtong gipistahan sa social media.

Ang kadagkoan sa CCTO miaksyon dayon sa reklamo ug mismo si acting Mayor Edgardo Labella miulbo sa kasuko diha nga nasayod sa gipakita nga taras sa traffic enforcer.

Gipadayag ni Labella nga dili mo-tolerate ang City Hall sa mga dautan nga pamatasan sa mga nag-alagad sa katawhan. Hinoon, ipaagi kini sa due process diin kun mapamatud-an nga sad-an, ang pagkataktak sa trabaho ang labing dako nga silot nga ipahamtang.

Leksyon kini ni bisan kinsa nga kinahanglan nga magmatngon kanunay ug dili magpadala sa gibati nga magpakita sa kaarogante ilabi na sa publiko tungod kay halos tanan nga tawo nagsilbe na karon nga "human CCTV" nga mo-record sa tanan nato nga binuhatan.

Kun mohimo ka og maayo sa imong isig ka tawo, moani ka og pagdayeg ug pasidungog, apan kun mohimo ka og bati, moani ka og mga pagsaway ug panghimaraot. Mao ni ang leksyon sa tawo nga nagpakabuta-bungol sa paghatag og serbisyo apan sensitibo ra kaayo ang "ego." Kuya bungol ka? Hala atimana!