EDITORYAL – Binay naleksyon

Ang lanog nga pag-booo sa mga tawo diha nga pasultihon na unta ni Mayor Michael Rama si Vice President Jejomar Binay atol sa pagbukas na sa Sinulog Grand Parade didto sa Cebu City Sports Center sa miaging Domingo, nagpaila nga dili Binay Country ang Sugbo. Wala makagusto ang mga Sugboanon nga modiskurso si Binay kay kandidato man siya pagka presidente sa nasud sa eleksyon karong Mayo 9 ug mahimong maduhigan og pamolitika ang kalihukan sa Sinulog.

Kun dili pa karon panahon sa eleksyon, tingali mahimo ra nga agwantahon sa mga Sugboanon ang pagpaminaw sa mensahe ni Binay, apan kay election period man karon mao nga supak sila niini.

Dili usab tukma ang pag-ingon nga kadtong daghang tawo nga mingu’b didto sa grandstand, mga alyado ra sa Bando Osmeña Pundok-Kauswagan (BOPK), ang kaatbang nga grupo sa Team Rama.

Adunay posibilidad nga daghan niadto ang mga kaalyado usab ni Mayor Rama nga wala usab makagusto nga sambogan og pamolitika ang kalihukan pinaagi sa pagpadiskurso ni Binay.

Nindot usab ang gihimo ni Binay nga nagpakahilom na lang siya ug wala moluwat og init nga pamahayag kabahin sa pag-booo sa mga Sugboanon kaniya. Pinaagi niadto, nakakuha og leksyon si Binay.

Angay’ng himuon ni Binay nga usa ka basehanan ang nahitabo nga pag-booo kaniya dinhi sa Sugbo aron paspasan pa niya ang pagpangampanya.

Apan hinuon bisan og unsaon pagpangampanya ni Binay, makuli siya nga makakumbensir sa katawhan kun magpabilin gihapon sa ilang alimpatakan ang mga isyu sa kurapsyon nga gipasangil batok kaniya. Gawas nga iyang tubagon kining mga isyu didto sa Sandiganbayan, angay usab nga moatubang si Binay sa katawhan, pinaagi sa mga sakop sa media nga dili iyang mga pinili, nga adto ra siya magpa-interview.