Bana nagumon sa drugas

Dear Atty. Divine,

Nagminyo mi sa akong bana last year, human sa among lima ka tuig nga long distance relationship kay didto man ko nagtrabaho sa gawas. Usa ka buwan human sa among kasal milarga ko pagbalik ug ako siyang gipetisyonan aron adto na sab siya motrabaho sa gawas. Apan akong namatikdan nga dili siya interesado nga moapas nako, hinungdan nga miuli ko nga wa magpahibawo kaniya kay basin aduna siya’y laing babaye. Nasurpresa ko sa akong nahibaw-an ug nadiskobrehan nga ang akong bana nagumon na diay sa gidiling drugas. Ang tanang kuwarta nga akong gipadala kaniya napunta lang tanan sa drugs. Matud pa sa iyang mga relatives nga dugay na nga drug addict ang akong bana. Nalibog ko unsa’y akong buhaton kay niwang na man siya ug dili na tarong ikasulti. Nagplano ko sa pagpa-annul sa among kaminyuon. Mahimo ba nga magamit nga ground ang iyang pagka drug addict sa akong pagpa-annul sa among kaminyuon? Daghang salamat. —Lenny

Dear Lenny,

Ang una nimong buhaton mao ang pagtabang sa imong bana pinaagi sa pagpailawom kaniya sa drug rehabilitation ug tabangan nimo siya nga mahunong na ang maong bisyo. Matud pa nila kining mga drug addict, mga biktima sab kini sila nga nagkinahanglan og tabang kanimo ug sa iyang pamilya. Apan kun pananglit dili na gyud madala kay bisan sa pagpa-rehab mobalik gihapon siya sa maong bisyo, ug gusto na gyud nimo nga ipa-annul ang imong kaminyuon, then, modangop ka sa korte. Posible nimo nga magamit nga basehan sa pagpa-annul mao ang Article 45, number 3, may labot sa presensya sa Fraud, base sab sa Article 46, number 4, kun kining gitawag og Concealment of drug addiction nga nag-exist na at the time of marriage. Kun duna kay ebidensya nga mopamatuod nga before sa inyong kasal drug addict na siya ug iyang gitago ang maong kamatuoran kanimo sa wa pa mo magminyo, hinungdan nga misugot ka nga nagpakasal mo, then mahimo kana nimo nga magamit nga ground. Mas maayo sab nga moduol gyud ka og abogado aron imong mahatag ang tanang detalye ug iyang matun-an ang imong kaso. Thanks and Pit Senyor! - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.