EDITORYAL - Professional Driver

Mahimo untang leksyon sa mga drayber sa mga pangpasaherong sakyanan ang nahitabo sa mga drayber nga gipamulta sa Land Transportation Office tungod sa ilang pagka-arogante ngadto sa ilang mga pasahero.

Katungod sa mga pasahero nga maharuhay ug luwas ang ilang biyahe ug kini gisalig nila ngadto sa mga drayber sa sakyanang ilang sakyanan. 

Way katungod ang drayber nga magbuot-buot paghimo og iyang kaugalingong patakaran, kung unsay anaa sa iyang prangkisa angay nga iyang sundon.

Labaw na nga wala silay katungod nga mangasaba, maninghag ug mangaway sa ilang pasahero ilabi na kung ang giinsister sa pasahero iyang katungod.

Kining mga aroganteng drayber nakalimot nga dili katungod ang pagbaton og driver's license kondili prebilihiyo lamang nga mahimong bawion sa gobiyerno.

Ila untang diniyoson ang ilang propesyon nga gipili kay ang gihatag kanila nga pagsalig sa gobiyerno nga makamaneho og mga pasaheroan pinaagi sa mga prangkisa nagtangag og kinabuhi nga ilang gidala.

Walay luna sa karsada ang mga drayber nga arogante, angay sila nga kuhaan og prebilihiyo nga makamaneho og sakyanan pinaagi sa pag-ban kanila nga makakuha pagbalik og lisensya.

Dili rason ang kamahal sa abang nila sa ilang pasaheroan aron sila magpakabagis sa mga inosenteng pasahero, dili rason ang kabug-aton sa trapik aron ilang hasion ilang pasahero, dili rason ang bisan unsang problema aron ilang abusaran ilang mga pasahero.

Walay relasyon ang maong mga problema sa drayber ngadto sa mga pasahero nga mao pay higayon nga nagkita mo sud sa sakyanan.

Salikwaot kaayo nga ang drayber sa mga pasaheroan nagbaton og "professional driver's license" apan barbaro ug way maayong pamatasan sa ilang panarbaho ug di gani mosunod sa simpleng Traffic Laws. Mao ba diay ni ilang gibuhi sa ilang pamilya ang kinitaan  gikan sa binuang inay magagikan sa tinarong nga pagpatulo sa singot?