EDITORYAL – Danghag nga drayber

Ang kainosente sa balaod sa pagmaneho’g sakyanan ingon man ang subra kadanghag sa drayber mosangpot gayud og dili maayo, posible pa nga mokalas kini sa kinabuhi sa drayber ug sa iyang mga pasahero.

Luoy lang ang mga pasahero kay gikan sa pagsakay niya sa sakyanan, ang iyang kinabuhi gitugyan na niya ngadto sa drayber. Mao nga angay’ng pilion ra gyud unta ang tugotan sa pagmaneho’g sakyanan.

Naligsan og trailer truck ang usa ka 6-anyos nga bata didto sa Barangay Tulic, Argao kaniadtong Domingo tungod kay danghag ang drayber nga mipugos sa pag-overtake sa trailer truck bisan og may awto nga iyang gikasugat.

Dili lapad ang karsada ug gani gibutangan kini og double solid yellow lines sa DPWH sa tunga nga bahin sa karsada didto sa Barangay Tulic aron pagpahinumdom sa mga drayber nga wala itugot ang pag-overtake o  ang paggawas sa linya, apan mipugos gayud ang drayber sa motorsiklo.

Nabag-id sa gikasugat nga awto ang motorsiklo mao nga misarasay kini ug nalabay ang bata ngadto sa ilawom sa trailer trak. Nalagpot ang ulo sa bata ug napisat ang iyang lawas nga nalatayan sa ligid.

Ang kapolisan adunay Highway Patrol Group, anaa usab ang Land Transportation Office (LTO), apan subo lang kay wala kaayo kini sila molihok aron dakpon ang mga motorista nga ignorante sa balaod, labaw na kun wala sila’y mga lisensya pagmaneho’g sakyanan.

Angay gyud unta nga ang mga opisyal sa kalungsoran mosugo sa ilang kapolisan, o kaha magmugna og team nga tinuoray’ng manakop sa mga drayber nga dili motuman sa balaod ug ang mga walay lisensya.

Ang nakadaot lang kay ang mga opisyal gusto nga walay masuko sa ilang mga lumolupyo, ilabi na karon nga nagsingabot ang eleksyon, mao nga nagpakabuta-bungol sila sa mga dakponon.