Pamolitika sa sunog

Nakapabor karon ang mga nasunogan sa Sitio Avocado sa Barangay Lahug tungod kay gihatagan gayud sila og special nga pagtagad sa kagamhanan sa dakbayan pinaagi ni Cebu City acting Mayor Edgardo Labella.

Dali kaayo sabton nga ang gihimo sa acting mayor tungod kini kay duol na ang piniliay, ilabi na nga ang Lahug giingon nga balwarte ni Konsehal Mary Ann Delos Santos.

Si Delos Santos nga kanhi kapitan sa Lahug ug karon konsehal sa dakbayan sa Sugbo, sakop sa Team Rama kaniadto, apan mitabok na karon sa BOPK nga gipangulohan ni kanhi  mayor Tomas Osmeña.

Ang Lahug dako nga barangay ug daghan kini og mga botante busa makapadaog kini og mga kandidato.

Mao kini ang rason ngano nga gipangga og maayo ang mga nasunogan sa liderato ni acting Mayor Labella nga kaalyado ni suspended Mayor Mike Rama.

Ang tumong niini aron nga dili masulo ni Osmeña, Mary Ann Delos Santos ug kaubanan sa BOPK ang mga botante sa Barangay Lahug.

Aron sa ingon nga kun magkinaunsa man, aduna gihapo’y makuha nga boto ang Team Rama sa Lahug.

Ang Team Rama midaog sa Lahug sa miaging piniliay kay diha pa man kanila ang kapitan niini nga si Delos Santos nga adunay lapad nga sumusunod.

Apan karon nga wala na si Delos Santos sa Team Rama mao kini karon ang nahimong dakong hagit sa kampo ni suspended Mayor Rama ug kaubanan.

Dinhi ato unya nga masukod ang inpluwensiya ni Mary Ann ug Mike Rama diha sa Barangay Lahug pagkahuman sa piniliay.