Nganong mobagulbol ka man?

Mata’g usa nato dunay bagulbolan. Lisud kaayo ang kinabuhi usahay mao nga tingali daghanan nato ang nahimong dili na hinuon maka-enjoy niini sa hilabihan. Ang problema ug ang atong reaksiyon niini maoy mohulma sa matang sa atong pagkatawo. Bisan kinsa ang mahiagom niining matanga sa buhat: Pagbagulbol. Apan sa laing bahin, mahinungdanon kaayo ang pagbagulbol aron makita ang imong habig ni bisan kinsa nga hingtungdan sa imong pagmulo. Mao nga dili maayo nga magpakahilom lamang, angay kitang mosulti apan sa paagi nga tarong ug makiangayon dili pintas ug dili maoy hinungdan sa kaungkagan nga tanan.