Brgy Cantabaco, Toledo City

Among reklamo diri sa among Sitio Apid Sir Jun kay bisag magsige’g uwan wala gyoy agas among tubig diri. Among mga opisyales wala gyod magpakabana aning among problema diri.

BRGY MOHON, SOGOD, CEBU

Sir sige mi’g bayad sa tubig diri sa Sitio Lingaob pero wala gyoy agas-agas nag-antos tawun mi diri. Anugon kaayo among gibayad nga tag 50pesos matag buwan nga wala mi kapahimulos sa tubig.

BRGY CONALUM, ARGAO, CEBU

Amo lang ireklamo ning usa sa among konsehal sa barangay kay isog kaayo sige man panukmag og tawo bisag way klarong sala nagsalig ra tingali ni siya nga naay katungdanan. Maayo unta’g maaksyonan kini sa taga DILG.

BRGY POBLACION, DANAO CITY

Misiaw na man hinoon ning mga motor nga saba kaayo tambutso matag gabii ni sila sige’g bahas-bahas sa karsada. Wa man magpakabana ang mga traffic enforcer diri sa siyudad aning problemaha nga unta gidili man unta ni sa balaud."

BRGY POBLACION, CARMEN, CEBU

Subo kaayo palandungon nga sa siyam ka tuig nga panerbisyo sa among mayor hangtod karun wala gyod ka butang og tinubdan sa tubig para namong molupyo diri. Ang nakaparat kay namaligya og tubig ngadto sa Manila Water ang among lungsod pero wa kaatiman sa ilang katagilungsod.

BRGY POBLACION, COMPOSTELA, CEBU

Ang dalan diri sa highway maayo pa man unta pero giguba man hinoon unya dugay kaayo gihuman pagtrabaho hasta ang dalan padung Sapak Farm pwerteng batia wala pa sad ayuha wala gyoy nagpakabana nga mga opisyal.

BRGY PUSOK, LAPU-LAPU CITY

Hangyo mi sa mga polis nga susihon kanunay ning among lugar diri sa Seaside dapit kay daghan kaayo mga batan-on mag estambay bisa’g kadlawon na hasol kaayo namong nagpuyo diri kay halos dili mi makatulog tungod sa kasaba sa lugar.

BRGY SAN JOSE, CEBU CITY

Manawagan mi sa mga opisyales sa among barangay nga ayuhon ang karsada diri padung sa CITE duol sa NORTHGEN kay bati kaayo daghang libaong. Kuyaw kaayo sa mangagi nga mga motorsiklo nga maoy kasagaran nga sakyan sa mga nagpuyo diri.

BRGY CAMBARO, MANDAUE CITY

Kanus-a man intawon ni mapaayo ang agianan diri sa Sitio Ampalaya nga hapit kada adlaw lapok kaayo kun dunay uwan labi na ning basketball court nga halos dili na maduwaan sa mga bata kay mura’g sapa na sa daghang tubig uwan nga magpundok.

BRGY CABCABAN, BARILI, CEBU

Nagpasalamat mi sir kang Cong Gwen Garcia kay daghan mi mga kabus nga senior citizens nga nahatagan og hinabang. Wa mi magdahum nga makadawat mi’g pinaskuhan nga mga kinilong bugas, de lata ug uban pa karung tuiga.

BRGY CAPITOL SITE, CEBU CITY

Hangyo mi sa mga polis nga susihon diri sa Ponce dapit kay duda ming naay nagpasugal diri og swertres, maayo unta’g mabadlong ni kay hasta mga bata tugutan man nila nga makataya nga unta sugal man tawun ni gidili sa balaud.

Alang sa inyong mga reklamo text lang sa 09062973166