Round 2

Kun sa boxing pa, matud ni Senador Grace Poe, "tuloy ang laban" tungod kay wala pa siya hingpit nga natumba ug wala pa siya iphi sa referee.

Siguro alang ni Poe, ang ikaduhang kanselasyon sa iyang Certificate of Candidacy, nga ning higayona gikan sa first division sa Commission on Elections, nakaigo man kaniya apan dili ingon kakusog.

Gani nalipay pa siya tungod kay dunay usa ka komisyonado nga nituo sa iyang mga argumento. Sa boxing pa, split decision ug dili unanimous.

May purohan pa nga mausab ang desisyon sa duha ka dibisyon. Busa modangop ang kampo ni Poe sa Comelec en banc aron kapugngan, kun mapugngan man, ug dili makanselar ang iyang COC.

Kini aron maapil pa siya sa opisyal nga listahan sa mga kalipikadong kandidato alang sa presidential election sa Mayo sunod tuig.

Apan mahimong subidahon na alang sa kampo ni Poe ang pagkombinsir sa Comelec en banc sanglit bug-at ang mga ebidensyang napresentar sa mga ni-question sa isyu sa residency ni Poe.

Dili usab malalis, kun ang mga dokumento diha sa iyang COC ang basehan nga nagkuwang siya og dul-an unom ka buwan una mohinog sa 10 ka tuig ang iyang pagpuyo dinhi sa Pilipinas, nga walay legal nga mga babag nga maoy gipangayo sa batakang balaod aron mahimong kalipikado ang  usa ka natural-born Filipino sa pagdagan sa pagka-presidente.

Bisan man tuod kun niinsister si Poe sa iyang pagka natural- born Filipino ug sa iyang hugot nga pagtuo nga dili kini angay ihikaw kaniya, wala niya hingpit makombinsir ang first division sa Comelec sa iyang pangulipas nga honest mistake kun walay malisya ang sayop nga datus sa iyang residency nga nakalatid sa COC sa iyang pagdagan pagkasenador niadtong 2013.

Angay hinumdoman ni Poe nga iyang gipanumpaan ang kaligdong ug kamatinud-anon sa mga impormasyon nga iyang gihatag ug gipahibawo, dili lang ngadto sa buhatan sa Comelec, kun dili sa publiko nga nisalig kaniya.

Nga ang maong mga kasayuran nagrepresentar sa iyang pagkatawo. Hinungdan man gani nga gihatagan siya sa mandato ug napili nga number one sa senatorial election niadtong 2013.

Nituo ug nisalig ang katawhang Pilipinhon sa iyang pagkamatinud-anon niadtong higayona. Apan karon nausab ang direksyon sa hangin nga gisubay ni Poe.

Gipatugbaw man ni Poe ang kasihag ug limpyo nga pamunoan isip kabahin sa iyang mga plataporma, angayan sigurong iya ning sugdan diha mismo sa iyang kaugalingon pinaagi sa pagkamatinud-anon.

Sama sa panultihon nga "honesty is the best policy".