Hukngay (Hukom angay)

DISYEMBRE 13, 2015: Ikatulong Domingo sa Adbiyento (Gaudete Sunday)

Mga Pagbasa:Zep. 3;14-18/is. 12/Fil. 4;4-7/Lk. 3;10-18

Si Juan Magbubunyag ang matud pa sa mga scholars ang giisip nga sakop sa mga Essenes. Kining mga essenes ang nimugna og usa ka katilingban didto sa Qumran agig pagpakita sa ilang pagsaway sa pabayang balansayon sa ilang tinuohan. Buot nilang mobalik sa tinubdan diin anaa ang kayano, ingon man  ang pagsakripisyo. Sa mas konkretong paagi, padayon siyang naghatag og mga giya kun unsaon pagpuyo sa kinabuhing nahasubay sa kabubut-on sa Dios. Tinuod matag usa nato buot mamahimong husto ug tarong nga mga tawo. Dili kita buot nga mamahimong mga tawo nga way igong kapaingnan. Mga tawong way padulngan. Apan sa laing bahin, dili lang paigo ang pangindahay sa kinabuhing yano. Hinunoa, dunay sistema nga iggambalay aron sa ingon mas epektibo ang maong tinguha. Sama gud sa usa ka kahugpongan dili paigo ang pagpunay og hisgot sa mga mithi diha sa balwarte sa mga balak ug mga diskurso, hinunoa, ang mga buhat nato maoy atong pasultihon.  Labaw na aron mamahimong mas epektibo ug gamhanan ang imong paghukngay kon hukom angay (criticize) kinahanglang sayud ka ug babad ka sa kinabuhi ni bisan kinsa nga imong gimaymayan ug gigiyahan.  Kun buot ka nga mamahimong magpuyo ang imong mga anak o ang imong ginsakopan sa ilang tagsa-tagsa ka mga pwesto ug gimbuhaton, ingon nga pangulo ipakita mo usab nga ikaw di lang pud magpunay og laag nga sa ato pa, You are more than Out than In! O dili ba kaha kun buot ka nga mamahimong epektibo ka diha sa imong mga hukom kinahanglang ipakita mo usab nga ikaw consistent sa imong mga desisyon.  Dili mag-usab usab kun si kinsa lang ang makapabor sa imong panalangin. Ning ikatulong Domingo sa Adbiyento nga mao ang Gaudete Sunday, atong saulogon ang kinabuhi uban gihapon ang pagmaya bisan pa man kun ang kinabuhi mismo ang maisip natong Disposable maingon nga ang matag tawo hinumdoman tungod kay sila functional ug kun di na mo function ang usahay hikalimtan na lang sa kadaghanan.