EDITORYAL - Nasayop si Mayor Rama

Dili nato mabasol kadtong mga tawo nga bisan og gipalakaw na ang tabi-tabi nga peligrong gamiton ang Butane/LPG canisters apan padayon sila niini nga migamit sa ilang pagpangluto.

Ang rason mao nga gitan-aw nila nga ang stove nga migamit og Butane/LPG canisters luwas ra kini nga gamiton kun nagmatngon lang ang mga migamit niini.

Misamot nga wala na mahadlok ang mga migamit og Butane/LPG canisters kay gitataw sa kabomberohan nga pipila ra gyud ka sunog nga ang hinungdan mao kining gagmay’ng lata nga gisudlan og LPG.

Bisan ang kahugpongan sa mga refillers niining Butane/LPG canisters mitataw nga dili kuyaw gamiton ang ilang produkto kay gigamitan nila kini og kahimanan aron dili maghinobra ang masulod nga LPG sa lata.

Ang dako og posibilidad nga mobuto mao kining mga Butane/LPG canisters nga gihimo sa gitawag og “backyard refillers” nga wala gani kasinatian sa ilang gimbuhaton.

Mao kini ang nahitabo mga tulo ka semana na ang milabay didto sa Barangay Kinasang-an busa ang angay’ng himoan og kampanya sa kagamhanan mao kining mga backyard refillers.

Ang mga sakop sa Cebu Budget LPGas Association, Inc. nagkasabot nga dili na sila modawat og mga canisters gikan sa ilang kustomers kun tayaon na aron paglikay nga adunay aksidente nga mahitabo.

Kini maoy tukma nga pagahimoon sa grupo aron nga ang kagamhanan dili magpanuko sa pag-abag kanila nga sila kahatagan og permiso sa pag-refill og mga Butane canisters.

Dili tukma ang lakang ni Mayor Michael Rama nga ipahunong niya ang paggamit og Butane/LPG canisters kay mao ra kini ang maabot sa mga kabus nga dili makaabot pagpalit og dagko nga tangke sa LPG.