EDITORYAL – SRP traffic angay solusyonan daan

Nakita nga aduna gyuy dakong problema sa trapiko diha sa South Road Properties kun sa higayon hingpit nang magamit ang tanang mga luna niini ug mabutangan og daghang mga establisamento ug mga opisina.

Atol sa pag-abli sa SM Seaside diha sa SRP, pwerteng taasa gyud sa traffic dili lang sa Mambaling Access Road kondili hasta sa may habig sa Cebu City Hall tungod sa kadaghan sa mga pribadong sakyanan nga nipadung sa maong mall.

Patilaw pa lang kadto nga problema sa trapiko nga kinahanglan nang daan nga pangitaan og paagi sa city planners sa Siyudad sa Sugbo aron di mauwahi ang tanan mentras wala pa mahurot ang mga luna sa SRP. Hinuon hinayhinay nga napangitaan og solusyon ang maong problema niadtong Sabado sama sa pagbutang gyud og kaparkingan sa tanang mga sakyanan nga adunay tuyo diha sa maong mall.

Makasabot usab ang mga motorista kay bag-o pa man nangabli ang maong tindahan maong gidugok kini dayon sa mga tawo.

Apan unsaon na lang kaha kun ang tanang mga luna sa SRP mahalin? Aduna na ba silay pagpangandam nga gihimo aron dili magkaproblema sa lugar?

Usa sa maayong buhaton niini mao ang pagbutang og dugang access roads padung sa SRP kay kining kasamtangang agianan dali rang mapuno sa mga sakyanan. Ang Mambaling access road hasta kanang lutsanan gikan sa Cebu City Hall ug sa Talisay City maayo lamang sa pagkakaron, apan kun modaghan na ang magnegosyo unya sa SRP madugangan ang volume sa traffic niini.

Kinahanglang dugangan pa ang mga access roads gikan sa Natalio Bacalso Avenue ug palapdan ang tanang mga dalan gikan sa Barangay Duljo-Fatima hangtud na sa Barangay Inayawan nga adunay kalutsan sa SRP. Mausik ra unya kining tanang gipangandoy sa siyudad alang sa SRP tungod lang sa traffic kay daghang manirado nga negosyo kay apektado sa problema sa trapiko.