EDITORYAL - Kinadatoan ang Sugbo?

Salikwaot kaayo paminawon karon ang balita nga ang probinsya sa Sugbo maoy kinadatoan nga probinsya lukop nasud.

Kini tungod kay pwerte mang daghana sa mga isyu ilabi na sa simpleng panginahanglan sa mga kabus nga mga Sugboanon gikan sa serbisyo sa mga publikong tambalanan nga gidumala sa probinsya.

Maayong paminawon alang sa uban apan bati alang niadtong mga pasyenteng kabus nga nahikawan sa serbisyong unta ilang madawat, kay pro-poor man kaha ang atong gobiyerno?

Nindot unta kun ang kadato sa lalawigan matagamtaman sa mga kabus nga libre dili lang ang serbisyo kondili hasta mga gamitonon sa pagtambal ug medisina. Mag-unsa lang man kining balita nga ang Lalawigan sa Sugbo maoy kinadatoan apan pwerte ka barot sa serbisyo sa mga tambalanan niini?

Si Gob. Hilario Davide ug Bise Gob. Agnes Magpale ug mga sakop sa Hunta Probinsyal tingali ra maoy seryoso sa pagpalambo sa serbisyo sa mga tambalanan tungod kay daghan man silang gipanghinganlang mga programa alang kuno sa kaayohan sa publiko.

Basin ang problema naa sa mismong mga tawo nga maoy gitahasan sa mga lider sa lalawigan aron trabahuon ang maong mga programa. Kun sila maoy hinungdan, unsa may rason nganong wala nila kini maimplimentar?

Dinhi dapita huyang ang lalawigan karon ug gikuninitan kini karon sa mga kritiko sa gobernador, busa angay nga kini maoy iyang seryusohon og trabaho.

Lisud ra ba kaayo kay hapit na ang eleksyon, ug kadaghanan sa mga modangop sa mga publikong tambalanan mga kabus, sila kadtong kinabag-an sa mga botante ug daling mangluod ug daling motuo sa mga propaganda batok sa lalawigan.

Ang angay buhaton sa Kapitolyo mao ang paggahin og dako nga pundo aning mga hospital apil na ang pagpamalit og mga gamit, medisina ug pag-hire og mga doktor ug medical personnel nga husto og sweldo.

Aron sa ingon di moisa ang kilay sa mga tawo nga dato ang lalawigan apan pobre kaayo og serbisyo ang mga tambalanan.