Ang pagbangon

Tangkod nga duha ka tuig karong adlawa nga gikuso-kuso sa super typhoon Yolanda ang Kabisay-an.

Nasentro sa kalibutanong atensyon ang pait nga kahimtang sa mga nabiktima sa bagyo, ilabi na sa dakbayan sa Tacloban ug Ormoc, lungsod sa Palo, ug ubang kasikbit nga mga lungsod sa Eastern Visayas nga maoy unang gikuso-kuso sa bagyo.

Pipila ka oras pa lang gani sa paghagiyos sa kusog nga hangin sa bagyo samtang wala pa hingpit mawagtangi sa suplay sa kuryente ang dakbayan sa Tacloban, nakapahibawo pa ang mga molupyo pinaagi sa social media sama sa Facebook sa kakusog sa hangin ug sa kalit nga pagsaka sa tubig.

Gipakita ang makalilisang nga talan-awon sa pagpanglutaw sa mga sakyanan ug ubang kabtangan nga gianod sa kusog nga bul-og sa tubig.

Pipila ka minutos, nibaha na ang kabalaka sa mga kabanay nga tua sa lagyo nga dapit tungod kay naputol na ang komunikasyon sa ilang mga paryente didto sa Leyte.

Apan wala pa matagbaw ang bagyong Yolanda. Human nga nibiya og dakong kadaot ug nikalas og daghang kinabuhi didto sa Leyte, gipatagamtam usab niini dinhi sa Sugbo ang iyang kabangis.

Ang mga lungsod sa amihanang Sugbo ang grabe nga naapektohan. Tulo ka rehiyon ang gikuso-kuso ni Yolanda sa wala pa hingpit mobiya sa nasud.

Apan human sa duha ka tuig, kumusta na ba ang kahimtang sa mga nabiktima sa bagyo? Hingpit na ba silang nakabangon gikan sa pait nga katalagman? o, nagpadayon gihapong gibagyo ang ilang kahimtang tungod sa kalisod sa panginabuhian?

Gipasigarbo ni National Economic Development Authority (NEDA) Secretary Arsenio Balisacan nga human sa dakong kadaot nga gibiyaan sa bagyong Yolanda karon nakabangon na ang mga apektado sa bagyo.

Nibalik na ang kalagsik sa panginabuhian ug patigayon dili lang sa dakbayan sa Tacloban kun dili lakip na sa ubang dapit nga naapektahan sa bagyo.

Dugang ni Balisacan nga nahuman-human na usab ang mga infrastructure projects sama sa kadalanan, mga taytayan, pantalan ug telecommunication facilities nga maoy nag-una nga mga inprastraktura sa pagpahiuli ug pagpalagsik sa ekonomikanhong kalihukan.

Mas gipalambo pa kini aron makasugakod sa posibleng pag-igo sa mas bangis nga katalagman.

Mas napagaan usab ang bug-at nga trabaho sa gobiyerno sa rehabilitasyon ug pagtabang sa mga nabiktima tungod sa pagpakabana sa nagkalain-laing sektor sa katilingban sama sa simbahang katoliko, mga non-government organization, mga pribadong indibidwal ug bisan sa International Community.

Dili man madali ang paghatod sa mga hinabang o ang pagtubag sa dinalian nga mga panginahanglan apan napakita sa kadaghanan ug bisan sa direktang mga nabiktima ang kadasig sa pagbangon, pagsugod ug pagpadayon sa pagpakabuhi.