Bag-o na ang BFP-7 direktor

Pormal na nga milingkod si Senior Superintendent Esmael Codilla isip bag-ong regional direktor sa Bureau of Fire Protection (BFP) Region-7.

Gipulihan ni Codilla sa katungdanan si Senior Superintendent Erlinda Tobias sugod kaniadtong Agosto 4. Tua na gibalhin si Tobias sa Region 13, ang Caraga Region.

Maisip nga hinog na kaayo si Codilla nga mahimong lider sa BFP-7 kay daghan na kaayo nga katungdanan ang iyang nahuptan, ilabi na ang pagka fire marshall sa dakbayan sa Sugbo sa dugay’ng panahon.

Nahimo na usab si Codilla nga assistant regional director for administration (ARDA), provincial fire marshal sa Bohol ug Cebu.

Usa ka maayong lider si Codilla ug ang tibuok BFP-7 nagmalaumon nga daghan unya siya og mahimo alang sa pagpalambo sa kalidad sa serbisyo sa kabomberohan ngadto sa publiko.

Gani tua sa kaulohan si Sr. Supt. Codilla aron pagdawat sa lima ka bag-ong fire trucks nga gipalit sa nasudnong kagamhanan.

Ang mao nga mga fire trucks magamit gayud sa pagpahigayon og fire-fighting operations kun may sunog. Ang tanang personnel sa BFP 7, mohangop ni Sr. Supt. Esmael Codilla sa bag-o niya nga hagit ug tahas!

* * *

Nagpadayon ang Bureau of Fire Protection (BFP)-7 sa pagpanawat og application alang niadtong buot mosulod pagka bombero.

Kadtong gusto mo-apply, bisita lang kamo sa BFP-7 regional office ug dad-a ang inyong mga papeles kay ang deadline karon pa nga Agosto 14.

Alang sa detalye sa mga requirements, mahimo ninyo nga tan-awon ang among Facebook account -- bfp_pis7.