Suhito apan nailad
Mas maayong paminawon si Presidente Aquino kun di magbasa og teleprompter. Way pandol ang tunga sa oras nga mas detalyado niyang pag-asoy sa kasaypanan sa Oplan Exodus sa Mamasapano, Maguindanao atubangan sa mga lider sa nagkalainlaing relihiyon sa tugkaran sa Malakanyang niadtong Lunes sa hapon.
Ug ambot naayo na ba sa iyang bisyo sa panigarilyo wa siyay hutoy ni ubo. Sa labing unang higayon, nakumbinser ko nga nasuhito ang presidente sa operasyon pagkuha sa gipasanginlang terorista nga si Zulkifli bin Hir alyas Marwan. Nga wa diay siya maglutaw ug nga di diay tinuod nga iresponsable niyang gilawog ang mga sakop sa Special Action Force (SAF) sa mas daghang mga rebelde.
* * *
Sa iyang kasuhito sa panginahanglan pag-atol sa operasyon nga gamay ang buwan aron makabentaha ang SAF sa ilang night vision goggles (NVG) ug pagpakatap og mas daghang commandos panagana kun motabang ang mga rebelde sa armadong mga sakop ni Marwan, niangkon si Aquino nga nailad siya sa girelibohang hepe sa SAF nga si Direktor Getulio Napeñas.
Subli niyang gipasanginlan si Napeñas nga nisupak sa sugo pakiglambigit sa militar ug namahala pagpamugos sa operasyon bisan nagkatibuwaag ug nalangay og duha ngadto sa tulo ka oras ang SAF commandos pag-abot ug pagpahimutang sa gitakda nilang mga destinasyon. Apan napakyas si Aquino pagpasabot nganong na-syut siya sa bolsa ni Napeñas.
* * *
Ang bisan unsang katin-awan ni Aquino sa engkuwentro sa Mamasapano magpabiling haw-ang kun padayon siyang manulisok apan magdumili pag-angkon sa iyang tampo sa trahedya. Ang iyang pagtugyan sa operasyon ngadto ni Direktor Heneral Alan Purisima, bisan gisuspenso na sa buhatan sa Ombudsman, mahimong maoy nakapalibog ni Napeñas. O kun burukinto gyod mahimong mas nakapaisog niya pagsukwahi sa presidente. Kay wa gyod hisgoti ni Aquino ang nabistong mga ebidensiya nga si Purisima ang nagmando ni Napeñas pag-solo sa operasyon, sa di pakigsawo sa kasayuran ngadto nilang Armed Forces Chief Gregorio Catapang, Interior Secretary Mar Roxas ug National Police Chief Leonardo Espina.
* * *
Tungod ba lang ni sa kagahi sa ulo ni Aquino, sa kataas sa iyang garbo ug sa talagsaon nilang kasuod ni Purisima? O maglisod lang pagpasabot sa iyang kauwangan sa operasyon nga nisangpot sa kamatayon sa 44 ka SAF commandos? Kun giisip nga mahinungdanon ang pakiglambigit sa militar ug liderato sa kapolisan, nganong wa man siya mangunay pagpahibawo nilang Roxas, Espina ug Catapang?
Kun tinuod nga si Purisima igo lang nitambag niya sa intelligence information ni Marwan, nganong si Purisima may iyang tinubdan sa tanang kasayuran, maoy gipangayoan og giya ni Napeñas ug maoy nagtakda sa aktuwal nga pagsugod sa operasyon? Hangtod nga moangkon ug mangayo og pasaylo sa iyang sayop, di makapaabot si Aquino nga maalim kining nagngutngot nga krisis sa iyang pamunoan.
* * *
- Latest
