Pinalabi sa plitehan
Dihang gipasaka ni Kongresista Manny Iway ang petisyon pagpaus-os sa plitehan sa PUJs (public utility jeepneys), wa siya magtinguha nga ang taga Metro Manila ra ang makapahimus sa mas ubos nga plitehan. Nakaseguro kong wa gyod masud sa iyang hunahuna nga ang iyang kaugalingong mga botante sa Negros Oriental ug ang mga pasahero sa Sugbo ug ubang bahin sa Central Visayas, nga iyang gialagaran niadto isip regional manager sa LTFRB (Land Transportation Franchising and Regulatory Board), maglaway lang sa P1 nga laslas sa plitehan.
Maong si Iway tingali ang labing nakugang dihang ang LTFRB nga gipangulohan ni Chairman Winston Gines nipahibawo nga iyang petisyon kapahimuslan lang sa mga pasahero sa Metro Manila ug kasilinganang lalawigan.
* * *
Di ignorante si Iway sa mga lagda sa LTFRB. Kay natudlo sang usa sa tulo ka sakop sa board sa LTFRB, ang labing taas nga buhatan nga tig-umol sa mga lagda sa industriya sa transportasyon. Gani atol sa iyang paglingkod nakaangkon ang mga pasahero sa makiangayong pagtagad sa kontrobersiya sa plitehan.
Mao nga ang petisyon klarong alang sa tibuok nasud, apil nang iyang distrito. Kay kun tinuod ang pangangkon ni Gines nga kinahanglang may buwag nga mga petisyon sa mga rehiyon, gidiretso unta ni Iway pagpasaka ang petisyon sa LTFRB sa Sugbo. Gawas kun nikalit siya’g kakumbinser nga ang paglingaw sa taga Metro Manila makapalig-on sa iyang pamolitika sa Negros Oriental.
* * *
Ang limitadong laslas sa plitehan maoy labing uwahing pruyba nga may mga opisyal gihapon nga nagtuo nga ang Pilipinas nagsugod ug natapos sa Manila. Sila nay labing dako og suholan, karon sila pa gyoy unang nakabenepisyo sa dakong pagtidlom sa presyo sa lana.
Sa pagkusokuso sa bagyong Ruby, ang Malakanyang gyoy nangunay pagsuspenso sa klase ug trabaho sa gobiyerno sa Metro Manila. Bisan sa biyahe ni Pope Francis, nga alang unta sa mga biktima sa katalagman sa Kabisay-an, ilang giilog ang upat sa lima ka adlaw nga pagduaw.
* * *
Kay layo man ta sa luwag, magpaabot ang mga Sugbuanon sa public hearing nga gitakda sa rehiyonal nga buhatan sa LTFRB sa sunod semana human nadawat ang petisyon paglaslas sa plitehan ni kanhi Cebu City Councilor Jun Pe. Ambot tungod ba kay nauna ang petisyon ni Iway, duha na ka public hearing ang napahigayon sa Manila, itlog pa dinhi sa ato.
Kun agdon ang LTFRB, nga klarong wa mag-apura paghatag og alibyo sa mga pasahero, abtan og bag-ong tuig una malaslasan ang plitehan. Mangahas ko pag-awhag nilang Gobernador Junjun Davide ug ubang lokal nga mga opisyal pagpadali sa proseso pinaagi sa pag-umol og kauyonan uban sa transport groups, nga mauwaw nang mosupak sa laslas sa plitehan. Papirmahon na lang isip saksi ang LTFRB.
- Latest
