Buslot sa PhiVolcs
Nabisto na sang kataphaw sa Philippine Institute of Volcanology and Seismology (PhiVolcs) sa linog nga nitay-og sa Sugbo ug Leyte sa Lunes sa buntag. Samtang paspas si PhiVolcs Director Renato Solidum nga nakahatag sa DYAB Radyo Patrol sa pasiunang kasayuran, naapsan na sab sila sa United States Geological Survey (USGS) sa pagtultol sa epicenter ug sa mga dapit nga naigo sa linog.
Magnitude 3.7 ang pasiunang sukod sa PhiVolcs. Sa labing una pa lang nilang pahibawo sa linog, ang USGS nitakda dayon nga Magnitude 4.5 ang linog. Naabtan ang PhiVolcs og dul-an sa oras una nakapausbaw sa ilang banabana ngadto sa Magnitude 4.2.
* * *
Nabantang ang labing dakong kalainan sa kalidad sa trabaho sa duha ka buhatan sa ilang pagtultol sa sentro sa linog. Ang PhiVolcs, kansang monitoring center sa Mactan naapil og katay-og sa linog, igo lang niingon nga ang epicenter nahimutang 50 ka kilometro sa amihanan silangang bahin sa Dakbayan sa Mandaue sa Metro Cebu.
Apan ang USGS nihatag og mas klaro nga hulagway: 15 ka kilometro sa habagatan-habagatan silangang bahin sa Pilar, Camotes, Cebu; 18 ka kilometro sa kasadpan sa Baybay City, Leyte; 36 ka kilometro sa habagatan sa Ormoc City, Leyte; ug 42 ka kilometro sa kasadpan sa Abuyog, Leyte.
* * *
Ato ning klaruhon. Way monitoring center ang USGS dinhi sa Sugbo o sa ubang bahin sa Kabisay-an. Igo lang silang nisawo sa kasayuran sa paglihok sa yuta nga nakuha sa kahimanan sa PhiVolcs. Sa ato pa, wa gyud untay rason nga maunhan sa USGS ang tinubdan sa ilang kasayuran.
Tingali mas paspas ug mas maayo ang sistema sa USGS sa paghukngay sa kasayuran. Tingali mas tambok ang burukrasya sa PhiVolcs. Tingali nagapos sab sila sa samang sistema sa Philippine Atmospheric, Geophysical and Astronomical Services Administration (PAGASA): Nga kasayuran sa Sugbo ug ubang mga lalawigan kinahanglan unang ma-imbudo sa ulohang buhatan sa di pa mapahibawo ngadto sa katawhan.
* * *
Laing di mapasaylo nga buslot sa PhiVolcs: Lupig sila sa kakugihan sa USGS pagsuhid sa atong kaugalingong mapa. Tanang nangaging linog sa Bohol igo lang nilang gisukod unsa kalayo gikan sa ilang monitoring center sa Tagbilaran City. Apan ang USGS naningkamot pag-ila sa labing duol nga mga lungsod.
Mao nga bisan mas duol sa linog ang Isla sa Camotes sa amihanang tumoy sa Sugbo ug sa amihanang tumoy sa Leyte, ang mas layo nga Dakbayan sa Mandaue ra gyoy ilang nakit-an. Tingali mas bantang lang ang Mandaue sa mapa nga ilang nabunlot. Maayo na lang hinuon nga wa ipamugos pagtultol ang sentro sa linog pinasikad sa gilay-on ini gikan sa ilang ulohang buhatan--587 ka kilometro sa habagatan silangan nga bahin sa Manila.
- Latest
