Kalainan sa last will ug deed of donation

Dear Atty. Divine,

Duna ko’y pangutana may labot sa akong mga kabtangan. Tiguwang na man gud ko ug walay anak apan naa ko’y pag-umangkon nga maoy nag-atiman nako. Nagplano unta ko nga maghimo og Last Will and Testament aron pagseguro nga ang maong kabtangan mapunta g’yud sa akong pag-umangkon inigkamatay nako. Apan duna say nakatambag nako nga mas maayo nga Deed of Donation ang akong buhaton kay mas dali ra ang proseso kay sa Last Will and Testament. Unsa may maayo nako nga buhaton aron pagseguro nga mapunta g’yud sa akong pag-umangkon ang akong kabilin?- Nanay Lucia

* * *

Dear Nanay Lucia,

Kining Last Will and Testament susama ra gihapon ni nga donasyon apan mo-epekto lang kini kun patay na ang nag-execute nga testator. Ang Last Will and Testament dili ‘sab automatic nga mapatuman bisan kun patay na ang hingtungdan kay moagi pa kini sa Korte pinaagi sa Probate Proceedings kay tan-awon pa sa Korte kun nasubay ba ang balaod sa pag-execute sa maong Last Will ug kun tinuod ba g’yud nga ang nagpirma niini mao ang testator ug kun nakasabot ba ang testator kun unsay iyang gibuhat. Busa duna g’yud kini hearing ug ipresentar g’yud ang mga testigo atul sa paghimo sa Last Will ngadto sa Korte.

Samtang ang Deed of Donation mo-epekto kini bisan buhi pa ang nagdonar. Sa ato pa, kun mo- execute ka og Deed of Donation sa imong mga kabtangan in favor sa imong pag-umangkon then ma-transfer dayon ang ownership niini bisan kun ikaw buhi pa. Dili na moagi sa Korte ang Deed of Donation, igo ra kana i-submit sa BIR aron sa pagbayad sa Donor’s Tax ug mahimo na’ng masugdan ang pag-transfer niini ngadto sa pangalan sa imong pag-umangkon. Busa kun gusto ka og mas sayon nga proseso ug dako sab ka og pagsalig sa imong pag-umangkon nga di ka pasagdan then mas sayon ang Deed of Donation. -Atty. Divine