EDITORYAL - Kinsa gani ang mga boss?

Sukad na presidente si PNoy, gibalik balik gyud nga ang mga tawo, ang mga nagbayad og buhis, maoy boss niya ug sa uban pang nagtrabaho sa gobiyerno.

Apan angay siguro pahinumduman ang ubang trabahante sa pangagamhanan, sama na lang sa mga barangay health workers sa usa ka health center sa Mandaue City, kung kinsa ang ilang boss.

Mireklamo ang usa ka amahan nga mibalibad ang mga BHW sa pagbakuna sa iyang anak kay kuno unahon nila ang mga pasyente sa center. Matud pa sa amahan sa iyang reklamo nga miingon ang mga BHW nga "magdinalo" usa sila sa tambal.

Ingon ani ba gud ang pagtratar sa mga boss? Basin nakalimot ang mga BHW kung asa kuhaa ang ilang honorarium? Kung nakalimot sila, pahinumduman nato nga ang buhis intawon sa mga tawo ang nagsuweldo nila.

Wala mi kasabot kung nganong mibalibad ang health center sa pagbakuna apan ibutang nato nga adunay pamaagi ang barangay sa pagpanghatag sa libreng bakuna sa mga residente. Kinahanglan ba gayud nga molitok ang mga BHW sa pulong mga "magdinalo" usa sila sa tambal? Kung adunay mga pamaagi ang barangay sa paghatag og libreng bakuna, angay siguro nga ipasabot kini sa mga residente og tarong. Dili sa hinambug nga paagi sama sa pag-ingon nga "magdinalo" usa sila sa tambal.

Sa pagsulti sa mga BHW nga magdinalo sila, mura na man hinuon og sila ang gamhanan ug ang makaluluoy ang nagbayad sa buhis!  Taym sa. Kinsa gani to ang boss matud pa sa presidente?