Hudlat ug tabang sa internet
Nagbasa ko sa libro sa peryodistang si Michael Harris (The End of Absence) nga puno sa kabalaka nga gilamoy na sa Internet ang mga haw-ang sa kahilom sa atong kabatan-on--nga atong gigahin paghanduraw, pag-umol og mga damgo ug pangandoy, paghangad sa panganod ug mga bituon, o pagpaniid sa atong palibot--dihang gipakuratan ni Manny Pangilinan ang tibuok nasud sa iyang pahibawo nga libre ang internet connection sa tulo ka higanteng mga kompaniya sa telepono nga iyang gipanag-iya.
Wa na ko mosubay sa kalisod ni Harris pagbasa sa baga kaayong libro nga War and Peace ni Leo Tolstoy samtang nagsige og lili sa iyang cellphone kay mas nadapit unsaon pagpahimus sa gideklarar ni Pangilinan nga demokratikanhong internet.
* * *
Sayon rang pagpahimus sa libreng mobile internet: I-text lang ang FREE ngadto sa 9999. Kinahanglang himuon ni matag adlaw aron makapahimus sa libreng mobile data adlaw adlaw. P1 ra ang gikinahanglang balanse. Molungtad ang promo hangtod sa kataposan sa Nobiyembre karong tuiga.
Hangtod 30mb ang mobile internet package nga mapahimuslan matag adlaw. Kitang naanad nga ibase sa oras ang bayad sa internet, makatabang ning giya: 1 plain text e-mail = 20 KB; 1 photo, file, or document = 500 KB; 1 Web page = 180 KB; 1 minute using a connected app or game = 3 MB; 1 minute of streaming music = 1 MB; 1 minute of streaming video = 3 MB; 1 MB = 1,024 KB; 1 GB = 1,024 MB.
* * *
Wa hinuoy apil sa promo ang peer to peer uploads ug downloads, videos ug VOIP. Ang prepaid subscribers mao ray makapahimus. Sa ato pa, maglaway ang kinabag-an nga post paid subscribers. Nipasalig si Pangilinan og paspas nga koneksiyon apan, kun nangaging kasinatian ang basehan, manguros na lang tang daan sa grabeng kamang kun mopahimus ang kasagaran sa 66 milyones ka prepaid subscribers.
Mas naghinam-hinam kong nagpaabot sa reaksiyon sa mga kumpetinsiya sa mga kompaniya ni Pangilinan. Puhalan ba nila ang promo? O mopakayab na sa puti nilang tualya?
* * *
Nadungan sang pahibawo ni Pangilinan sa reklamo sa FBI sa Estados Unidos batok sa encryption nga gipatuman sa Apple ug Google sa labing bag-o nilang operating systems (iOS8 ug Android L). Matud sa FBI ang encryption makapalisod sa kampanya batok sa terorismo nga nagpahimus sa internet.
Sama rang gidasonan sa FBI ang pasangil sa whistleblower nga si Edward Snowden, kanhi espiya sa National Security Agency (NSA), nga gilili sa Amerikanhong gobiyerno ang tanang emails, chats ug voice calls gikan ug padung sa US ug ubang kanasuran. Gipahimuslan nilang aktibong tabang o buslot sa sistema sa higanteng mga kompaniya sa internet. Maayo na lang nga ang Apple ug Google nibarug pagpanalipod sa privacy sa ilang networks
- Latest
