Lapas nga pagkoral

Dear Atty. Divine,

Duna ko’y yuta nga kapin sa 8,000 square meters ang gidak-on. Niadtong 2012 nagbaligya ko og part sa maong yuta nga 3,000 square meters busa may nahibilin pa kami nga kapin sa 5,000 ka square meters sa maong luna. Karon attorney ang nakapalit nagbutang na man og poste nga semento  ug gilinyahan kini’g alambre didto g’yud sa tunga sa among yuta hinungdan nga nangreklamo ang akong mga anak. Unsa may maayo namo nga buhaton aron mahusay mi sa malinawon nga paagi niini’ng gihimo sa nakapalit sa among yuta. Hinaot nga imo mi nga matambagan niini. Daghang Salamat. - Ladislao

Dear Ladislao,

Kon portion ra sa maong yuta ang imong gibaligya niadtong 2012, hinaut nga imong giklaro sa nakapalit kon asa nga portion aron magiyahan siya kon asa dapita ang iyang gipanag-iya. Ang maayo unta ninyo nga gibuhat niadtong higayona inyong gipa-survey ang yuta aron mahibaw-an kon pila g’yud ang actual nga gidak-on niini ug ang 3,000 square meters nga inyong gibaligya ma-identify ‘sab kon asa ang mga utlanan niini kay lisud man kon bana-bana lang. Ang maayo ninyong buhaton karon mao ang pagpakigsulti sa nakapalit ug paghusay mo kon asa ang utlanan sa iyang yuta, kon di mo magkasinabot mas maayo nga mopasaka mo og reklamo sa barangay diin nahimutang kanang inyong yuta aron adto kamo maghusay. Ang laing solution ‘sab sa maong problema mao ang pagpa-survey sa maong luna ug unya ipa-identify kon asa dapita kutob ang iyang 3’000 square meters nga iyang napalit aron mabutangan og mohon ug magiyahan siya kon asa siya kutob nga magkoral. Thanks and God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City  or email sa [email protected]. ug akong tubagon ang inyong pangutana pinaagi sa akong column matag Miyerkules ug Domingo.