EDITORYAL - Problema sa drugas

Sagunson ang mga operasyon batok sa mga drug personalities sa Kabisay-an. Maayo kini nga lakang nga gihimo sa kapolisan ug uban pang law enforcement agencies.

Apan kuwang ra ang ilang gibuhat tungod kay wa pa gihapoy nadakpang dagko gyud nga mga drug personalities nga kana gyung makaingon ta nga mapiang gyud ang operasyon sa illegal drugs sa Central Visayas.  Ning bag-o lang, duna nay mga polis nga nakalas tungod sa kangilngig na sa mga drug suspects.

Nagpabilin gihapon ang tanghaga kon hangtod kanus-a mag-antos ang publiko niining hilo sa drugas dinhi sa katilingban. Daghan nang mga kaugmaon ang nangausik tungod niini samtang pipila lang ang nakasapi niini nga wala’y kahadlok sa ilang operasyon.

Kon kaniadto pa gipangpuo dayon kining mga nagpasiugda niining maong operasyon dili maingon niini kadako ang problema karon sa illegal nga drugas.

Imposibleng way kasayoran ang mga awtoridad kon kinsa o bisan na lang pagduda ang mga awtoridad kon si kinsa gyud kining mga druglords nga nag-operate sa kada lugar.

Sayod ang katawhan nga dili g’yud kini mahitabo, apan unsa kaha kon bisan usa lang ka semana, rondahon sa atong kapolisan ug law enforcement agencies kining mga druglords nga ilang gidudahan nga maoy nagpasiugda niini. 

Susama ba og ‘protection holidays, ’ kadtong mga protektadong drug lords wagtangan sa ilang gi-enjoy nga seguridad kay apilon usab pagsikop kadtong mga gidudahang ‘protektor’ nila  nga naa sa gobiyerno.

Dili mahurot kining mga ‘big time,” “level one, two ,o  three “ street pushers kon pabiling gawasnon kining mga dagkong isda nga gidudahang dunay proteksyon gikan sa mga awtoridad.