Angay nga puohon

Gisugdan na ang pagputol sa mga century-old nga acacia nga naglinya sa national highway gikan sa dakbayan sa Naga ngadto sa dakbayan sa Carcar. Kini bisan pa sa grabe nga oposisyon sa mga environmentalists.

Tungod niini, gisirad-an una ang mao’ng dalan samtang kamulo pa ang pagpamutol sa mga acacia. Ug naghatag kini og dako’ng kahasol tungod kay dili usa paagian sa mga sakyanan ang mao’ng highway.

Tuod man daghan ang gisayangan sa mao’ng mga kahoy. Tungod lagi kay naghatag sila og dekorasyon ug landong sa taas nga porsiyon sa mao’ng highway, bisan ako nawili usab sa ilang pagkahanaw.

Naanad na man gud kita nga matag agi nato sa mao’ng lugar, presko ug hamugaway ang ato’ng paminaw sa palibot. Kini tungod sa mga kahoy nga nagbuntaog sa kilid sa dalan nga maoy naghatag og tumang kabugnaw.

Apan bisan pa man niini, risgo usab sa ato’ng kinabuhi ang tigulang na nga mga kahoy. Huyang na ang pipila kanila ug dali lamang nga matumba. Hinungdan nga kuyaw kini sa mga commuter ug motorista.

Gani adunay pipila sa mga kahoy ang natumba na tungod kay dili na makasugakod ang ilang mga gamut. Sa usa ka acacia nga natumba, walay suwerte ang usa ka trak nga puwerte ang pagkaigo. Maayo na lamang nga walay naangol o nakalas sa mao’ng insidente.

Apan gumikan sa dako’ng kakuyaw nga dala sa mao’ng mga acacia sa katawhan, angay lamang nga puohon kini’ng mao’ng mga kahoy aron nga malikayan ang dugang disgrasya. 

Bisan kun unsaon pa pagbabag sa mga environmentalist nga dako’ng kadaut sa kalikopan ang pagputol sa mga acacia, dili usab nato ikalimod ang dako’ng risgo nga dala niini’ng mao’ng mga kahoy. Unsa man ang ato nga palabihon, ang kaimportante sa mao’ng mga acacia o ang kinabuhi sa katawhan kinsa nahimutang sa kakuyaw tungod sa kahuyang na sa maong mga kahoy?   

Hinaut nga magsilbe nga leksiyon ang nahitabo sa usa ka drayber kansang jeepney nga gimaneho maayo’ng pagkaigo sa diha’ng natumba ang dako’ng acacia diha sa Barangay Zapatera, Cebu City pipila ka tuig na ang nakalabay.

Patay dihadiha ang mao’ng biktima.