Katoliko ug Iglesia maglantugi karon

Sa unang higayon dinhi sa Sugbo ipahigayon sulod sa Cebu Coliseum ang dako’ng debati tali sa Iglesia ni Cristo (INC) ug Iglesia Catolica Apostolica Romana (Katoliko) karong adlawa gikan sa ala una sa hapon hangtod alas utso sa gabii.

Dili g’yud kini maoy una nga higayon nga gihimo sa mga tiglantugi kon “debater” sa mao nga mga relihiyon kay hapit man gani kada adlaw adunay panaglantugi diha sa Plaza Independencia ug sa uban pa nga lugar dinhi sa siyudad.

Apan sa tibuok kasaysayan dinhi sa Sugbo, karon pa ang una’ng  higayon nga anha  kini himoa sulod sa Cebu Coliseum base sa akong natiman-an.

Tingale himoon kini aron walay samok ug makapaminaw pag-ayo ang tanang motambong sa matag ipamulong sa mga tiglantugi nga magbayloay sa ilang baruganan.

Kadtong mga tigyaga-yaga dili na usab makapatuyang sa ilang gusto diha sulod sa coliseum kay dali ra man siya’ng mabadlong sa dili nila maayo nga taras.

Wala ‘say away kay ang mga tiglantugi nasayod man sa ilang limitasyon ug sama sa boksidor nga inighuman maglamano kay wala may personalan, igo ra man sila nga moyagyag sa ilang baruganan base sa isyu nga hisgotan.

Aw hinuon, kun mapakyas sila sa pagpamatuod sa tema nga iyang gibarugan, malagmit ang tiglantugi mobati g’yud og kaulaw atubangan sa daghang mga tawo nga mosaksi ug maminaw.

Duha ka tema ang lantugian niining maong debati. Una nga mobarog mao ang tiglantugi gikan sa Katoliko nga mobatbat sa tema nga si Cristo mipili ni Apostol Pedro nga maoy unang Santo Papa kon labaw’ng pari sa mga Katoliko.

Ikaduha nga mobarug mao ang gikan  sa INC nga mopamatuod nga si Brod Felix Y. Manalo maoy sinugo sa Dios ning ulahi’ng mga adlaw.

May moderator nga mokuyme sa maong debati ug mora’g nagkisi-kisi na ang mga mahiligon kaayo’ng maminaw og debati aron pagsaksi niini.

Ambot dili ba kaha mapuno ang Cebu Colesium sa mga motambong sa maong debati kay libre ra ba kini ug walay bayad.

Maayo baya tingali nga ato kini’ng tambongan aron masayran nato kun makapamatuod ba ang matag tiglantugi sa tema nga ilang debatehan. ([email protected])