Napoles di maayong i-state witness

Nakahunahuna ang nanagdala sa renda sa balaud nga himuong state witness si Janet Napoles, ang tuburan sa P10-B pork barrel scam. Husto pa kaha ang dagan sa ilang utok?

Si Napoles nga namatud-an nang sige’g lihay sa mga akusasyon nga gibato ngadto kaniya sa whistleblower, Benhur Luy, kinsa may lig-ong ebidensiya nga gikuptan, maoy pasultion sa tanang hitabo bugti sa iyang kagawasan? Luyo sa iyang pagkadaotan, diin ang tinuod pirme niyang gitagoan sa pagpamakak, mosalig lang gihapon niya ang mga imbestigador ug maghuhukom sa Senado?

Nagpasabot ba kini nga ang mibulgar sa iyang mga hiwing binuhatan maoy bakakon? Ug siya si Napoles mao ra ang bugtong binuhat nga makasulti sa tinuod? Human kawati ang Republika sa Pilipinas og binilyong kantidad sa kahago sa mga mamumuo, himuon pa gihapong state witness si Napoles sa mga binuang, diin siya ra usab mismo ang author? Hugot pa kaha ang angay sa kuwerdas sa atong hustisya?

Si Napoles nga maoy prime suspect sa binilyong pork barrel scam, mao pay patestigoson kinsay iyang mga kauban sa pagpangawat? Segurado kaha ang korte nga motug-an siya sa tinuod? Gani, ning bag-o lang, daw naghuramentado man si Napoles, nagpataka la’g tudlo kinsang mga Senadora ug Kongresista ang involved, diin hasta ang mga inosente ug ligdong politiko giapil sa iyang kaguwatsinangga. Nagmatuod lang kini nga si Napoles dili kasaligan.

Busa, dili gyud maayo nga i-state witness si Napoles. Guba na ang kredibilidad sa iyang pagkatawo. Napusgay na ang atong pagsalig kaniya. Unya, magpatonto lang gihapon ta?

Mga magbabalaud, kaming katawhan...dili ug dili gyud mosugot, ha?